အောင်ပြည့်

အဖ ဦးသာအောင်၊ အမိ ဒေါ်စိုးမြင့်တို့မှ ဖွားမြင်သည့် စတုတ္ထမြောက် သားဖြစ်သူ မောင်ခင်မောင်မြင့်အား ပျဉ်းမနားမြို့တွင် ၁၉၄၀ ခုနှစ်၊ ဇူလိုင် ၂၄ ရက် (ကြာသပတေးနေ့) က မွေးဖွားခဲ့သည်။ ပြွန်တန်ဆာ အထက်တန်းကျောင်းမှ ၁၀ တန်း အောင်မြင်ခဲ့ကာ ရန်ကုန် တက္ကသိုလ်မှ ဝိဇ္ဇာ (မြန်မာစာဂုဏ်ထူး) ဘွဲ့ ရခဲ့ပါသည်။

စာရေးဆရာ၊ အယ်ဒီတာ၊ ရုပ်ရှင် သရုပ်ဆောင် အောင်ပြည့် (ဦးခင်မောင်မြင့်) (၁၉၄၀ - ၂၀၀၆)။ (ဓာတ်ပုံ - လင်းဦး (စိတ်ပညာ) ဘလော့)

ဘွဲ့ရပြီးနောက် 'ဦးဆောက်ပန်း' အမည်ဖြင့် ရန်ကုန်မြို့ လှည်းတန်းမြို့နယ်တွင် စာအုပ်ဆိုင် ဖွင့်လှစ်ခဲ့ပြီး စာပေများလည်း ရေးသားခဲ့သည်။ အထူးသဖြင့် ရှုမဝမဂ္ဂဇင်း၌ ဝတ္ထုတိုများစွာ ရေးသားခဲ့ပါသည်။ "ပြိုမှာလေလား မိုးရဲ့" ဝတ္ထုသည် အအောင်မြင်ဆုံး၊ အထင်ရှားဆုံးသော သူ၏လက်ရာ ဖြစ်ခဲ့ပြီး ရန်ကုန် တက္ကသိုလ် ရွှေရတုသဘင် ကာလတွင် ထုတ်ဝေခဲ့သည့် "နေရစ်တော့ မြသီလာ" ကဗျာစာအုပ် သည်လည်း ထူးခြား ဆန်းသစ်သည့် အရေးအဖွဲ့များကြောင့် ထင်ရှားခဲ့ပါသည်။

စာနယ်ဇင်း ဆရာ၊ အယ်ဒီတာ အဖြစ် အထောက်တော် လှအောင် ဦးစီးသည့် သတင်းဂျာနယ်၌ စတင် ထုတ်ဝေသည့် ၁၉၆၉ ခုနှစ်တွင် တွဲဖက် အယ်ဒီတာ အဖြစ် လည်းကောင်း၊ နောက်ပိုင်း တာဝန်ခံ အယ်ဒီတာ အဖြစ် လည်းကောင်း တာဝန်ယူ ဆောင်ရွက်ခဲ့ပြီး နောက်ပိုင်း ချယ်ရီမဂ္ဂဇင်း (၁၉၈၄ မှ ၁၉၉၀)၊ ဝါနီပြာမဂ္ဂဇင်း၊ နှင်းဆီမဂ္ဂဇင်း၊ ပေါ်ပြူလာဂျာနယ် နှင့် ရာစုဂျာနယ် စသည့် မဂ္ဂဇင်း၊ဂျာနယ်များတွင် တာဝန်ခံ အယ်ဒီတာ အဖြစ် လည်းကောင်း အယ်ဒီတာချုပ် အဖြစ် လည်ကောင်း တာဝန်ယူ ဆောင်ရွက်ခဲ့ပါသည်။ ဖတ်စရာဂျာနယ်သည် ဆရာအောင်ပြည့်၏ နောက်ဆုံး ကွယ်လွန်ချိန် အထိ အယ်ဒီတာချုပ် အဖြစ် တာဝန်ယူဆောင်ရွက်သွားသည့် ဂျာနယ် ဖြစ်ပါသည်။


အခြားတစ်ဖက်တွင်လည်း ရုပ်ရှင် သရုပ်ဆောင် အဖြစ် လုပ်ကိုင်ခဲ့ရာ ဒါရိုက်တာ မောင်ဝဏ္ဏ ရိုက်ကူးခဲ့သော 'ခြေဖဝါးတော် နုနု' (၁၉၇၄) ဇာတ်ကားမှစကာ သရုပ်ဆောင် အဖြစ် စတင်ခဲ့ပြီး နောက်ပိုင်းမှာလည်း ရုပ်ရှင် ဇာတ်ကားပေါင်း များစွာတွင် အောင်မြင်သော ဇာတ်ပို့ သရုပ်ဆောင် အဖြစ် ပါဝင်ခဲ့ပါသည်။


ရန်ကုန် တက္ကသိုလ်မှ မြန်မာစာဘွဲ့ရ ဖြစ်သော ဆရာ အောင်ပြည့်ဟာ 'စကားအကြောင်း၊ စာအကြောင်း' ဟူသော မြန်မာစာနှင့် ပတ်သက်သည့်စာအုပ်တစ်အုပ်ကို ရေးခဲ့ကာ ကိုယ်ပိုင် ကျောင်းများတွင်လည်း မြန်မာစာပြ ဆရာတစ်ယောက် အဖြစ် နှစ်ကာလရှည်ကြာစွာ အသက်မွေးခဲ့ပါသည်။

ကျင်လည်ရာ လောကများစွာထဲတွင် ဆက်ဆံရေး ကောင်းမွန်ကာ လူချစ် လူခင်များသူ၊ အလုပ်ကို ကြိုးစား လုပ်ကိုင်သူ အဖြစ် ထင်ရှားသည်။ ဘဝနောက်ဆုံး အချိန်များတွင် နာမကျန်း နေသည့်ကြားမှ အိပ်ယာထက်တွင် အလုပ်တာဝန်ကို ဇွဲနပဲနှင့ တာဝန်ယူ ဆောင်ရွက် သွားခဲ့ပုံသည် တပည့်များကြား၊ မိတ်ဆွေများကြား ပြောစမှတ်ပြုစရာ၊နမူနာယူစရာ အဖြစ်တစ်ခုဖြစခဲ့ရသည်။

စာရေးဆရာ၊ အယ်ဒီတာ၊ ရုပ်ရှင် သရုပ်ဆောင် ဆရာ အောင်ပြည့်သည် ကာလရှည်ကြာ နာမကျန်း ဖြစ်ကာ လဲလိုက် ထလိုက်ဖြင့် ဖတ်စရာ ဂျာနယ်ကို တစစောင်မပြတ် တည်းဖြတ် ထုတ်ဝေခဲ့ရာက ၂၀၀၆ ခု၊ ဧပြီလ ၂၆ ရက် ညနေ ၆ နာရီခန့်မှာ ကွယ်လွန် ခဲ့ရပါသည်။ ကွယ်လွန်ချိန်တွင် သားသမီး ၃ ဦး၊ မြေး ၃ ဦးနှင့် ဇနီးဖြစ်သူ ဒေါ်မာသီတို့ ကျန်ရစ်ခဲ့ပါသည်။ [1]

ကိုးကား
  1. [foreverspace.com.mm] ရဲ့ ကြေကွဲ ဝမ်းနည်း မှတ်တမ်း ကွန်ရက် စာမျက်နှာနဲ့ လင်းဦး (စိတ်ပညာ) [linoo.asia] ဘလော့ တို့ကနေ "စာရေးဆရာ၊ အယ်ဒီတာ၊ ရုပ်ရှင် သရုပ်ဆောင် အောင်ပြည့် (ဦးခင်မောင်မြင့်) (၁၉၄၀ - ၂၀၀၆)" ရဲ့ အတ္ထုပ္ပတ္တိအကျဉ်း
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.