ကြည်အောင် (ဝန်ကြီး)

ဦးကြည်အောင်သည် ၁၉၉၅ ဇွန်လ ၁၈ ရက်မှ ၁၉၉၇ နိုဝင်ဘာ ၁၆ ရက်အထိ South Burma Sub District (SBSD) ဌာနချုပ်မှူးအဖြစ် တာဝန်ထမ်းဆောင်ခဲ့သည်။[1]

၁၉၉၇ ခုနှစ် နိုဝင်ဘာ ၁၅ ရက်နေ့တွင် နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီသည် အစိုးရအဖွဲ့၏ ဝန်ကြီးချုပ်၊ ဒုတိယဝန်ကြီးချုပ်များနှင့် ဝန်ကြီးများကို ထုတ်ပြန်ကြေငြာခဲ့ရာ ဗိုလ်ချုပ်ကြည်အောင်သည် ပြန်ကြားရေးဝန်ကြီး အဖြစ် ခန့်အပ်ခြင်း ခံခဲ့ရသည်။[2]

၁၉၉၉ ခုနှစ် စက်တင်ဘာ ၃၀ ရက်နေ့တွင် အမျိုးသားဒီမိုကရေစီအဖွဲ့ချုပ်က ဗိုလ်ချုပ် ခင်ညွန့်၊ ပြည်ထဲရေး ဝန်ကြီး ဗိုလ်မှူးကြီး တင်လှိုင်၊ ပြန်ကြားရေး ဝန်ကြီး ဗိုလ်ချုပ်ကြည်အောင်နှင့် အခြားသူများအား အာဏာအလွဲသုံးစားပြုမှုဖြင့် အမှုဖွင့် တိုင်ကြားခဲ့သည်။ တစ်လခန့်အကြာတွင် ပြည်ထောင်စု တရားလွှတ်တော်ချုပ် တရားသူကြီးချုပ်က သက်သေခံမရှိသည့်အတွက် အမှုကို ပလပ်ခဲ့သည်။[3]

၂၀၀၂ ခုနှစ် စက်တင်ဘာ ၁၃ ရက်နေ့တွင် ဗိုလ်ချုပ်ကြည်အောင်အား ယဉ်ကျေးမှု ဝန်ကြီးအဖြစ် ပြောင်းလဲခန့်ထားခဲ့သည်။ ပြန်ကြားရေးဝန်ကြီးနေရာတွင် ဗိုလ်မှူးချုပ် ကျော်ဆန်းအား ပြောင်းလဲ ခန့်အပ်ခဲ့သည်။[4] စာရေးဆရာ၊ ကဗျာဆရာနှင့် ဂျာနယ်လစ်တစ်ဦး ဖြစ်သူ ဦးစိုးညွန့် သည် ဗိုလ်ချုပ်ကြည်အောင်လက်အောက်တွင် ယဉ်ကျေးမှု ဝန်ကြီးဌာန ဒုတိယဝန်ကြီးအဖြစ် ၂၀၀၃ ခုနှစ်အထိ တာဝန်ထမ်းဆောင်ခဲ့သည်။[5]

ယဉ်ကျေးမှု ဝန်ကြီးအဖြစ် တာဝန်ထမ်းဆောင်နေစဉ် ကာလအတွင်း ဥရောပသမဂ္ဂကောင်စီသည် စစ်အစိုးရ အရာရှိများအား ဗီဇာနှင့် ပြည်ဝင်ခွင့်ပိတ်ပင်သည့် စာရင်းကို ၂၀၀၃ ခုနှစ် ဇွန်လတွင် ထုတ်ပြန်ခဲ့ရာ ဗိုလ်ချုပ်ကြည်အောင်နှင့် ဇနီးဖြစ်သူ ဒေါ်ခင်ခင်လေးတို့ ပါဝင်ခဲ့သည်။[6]

၂၀၀၆ ခုနှစ် မေလတွင် ဗိုလ်ချုပ်ကြည်အောင်အား တာဝန်မှ အနားယူခွင့် ပြုခဲ့သည်။ ယဉ်ကျေးမှု ဝန်ကြီးအဖြစ် ယခင် ကာကွယ်ရေး ဝန်ကြီးဖြစ်သူ ဗိုလ်ချုပ် ခင်အောင်မြင့်ကို အစားထိုး ခန့်အပ်ခဲ့သည်။[7] ၂၀၀၇ ခုနှစ် မေလတွင် ဗိုလ်ချုပ်ကြည်အောင်၏ ဇနီးအမည်အား ဥရောပသမဂ္ဂ၏ ပိတ်ဆို့မှုစာရင်းမှ ဖယ်ရှားခြင်း ခံခဲ့ရသည်။[8]