ဘောရစ် ဂျွန်ဆင်

ဂျွန်ဆင်ကို နယူးယောက်မြို့ မဟတ္တန်အထက်ပိုင်း၏ အရှေ့ခြမ်းတွင် ၁၉၆၄ ဇွန် ၁၉တွင်မွေးဖွားခဲ့သည်။ [10][11][12] ဖခင်နှင့်မိခင်မှာ စတန်လေ ဂျွန်ဆင်(ထိုစဉ်က ၂၃နှစ်ရှိ၍ နောက်တွင် ကိုလံဘီယာတက္ကသိုလ်တွင် စီးပွားရေးပညာတက်ရောက်)[13][14]နှင့် သျှားလတ် ဖောစက် (၂၂နှစ်အရွယ် ပန်းချီဆရာမ၊ဖခင်မှာ ရှေ့နေ ဆာ ဂျိမ်းစ် ဖောစက်)တို့ဖြစ်ကြပြီး [15] ၎င်းတို့နှစ်ဦးမှာ ၁၉၃၆တွင်လက်ထပ်ခဲ့ကြပြီးနောက် အမေရိကသို့ပြောင်းရွှေ့နေထိုင်သည်။[16][17]၁၉၆၄ စက်တင်ဘာတွင် အင်္ဂလန်သို့ပြောင်းရွှေ့ကာ ၁၉၆၅၌ သမီးဖြစ်သူ Rachel ကိုဖွားမြင်သည်။ [18] ၁၉၆၆တွင် အမေရိကန် ဝါရှင်တန်မြို့တော်သို့ ရွှေ့ပြောင်းပြန်ကာ စတန်လေမှာ ကမ္ဘာ့ဘဏ်တွင်အလုပ်ရရှိသည်။[19][20][21] တတိယမြောက်ကလေး Leoကို ၁၉၆၇ စက်တင်ဘာတွင်ဖွားသည်။[22][21] ၁၉၆၉တွင် အင်္ဂလန်သို့ ထပ်မံပြောင်းရွှေ့ကြသည်။ ဂျွန်ဆင်မှာ ကလေးတစ်ယောက်အနေဖြင့် ငြိမ်ငြိမ်ဆိမ်ဆိမ်နေတတ်၍ ကြိုးစားမှုရှိသည်။[23] နားလေးခြင်းရောဂါကိုခံစားရကာ နားစည်အတွင်းပိုင်းသို့ grommet ခေါ်ပြွန်သေးတစ်ချောင်းဖြင့် အစားထိုးခွဲစိတ်မှုပြုခဲ့ရသည်။[18][24] ဂျွန်ဆင်တို့မောင်နှမများကို ငယ်စဉ်ကတည်းကပင် အတွေးခေါ်ပိုင်းဆိုင်ရာ လုပ်ဆောင်မှုများကိုအာပေးခဲ့ကြသည်။ [25][26] ၎င်းကလေးဘဝ၏ အစောဆုံးမှတ်တမ်းတင်ထားသောရည်မှန်းချက်မှာ ကမ္ဘာ့ဘုရင် (world king) ဖြစ်ရန်ဟု ဆိုသည်။[27][28][29] ၁၉၇၁နှောင်းပိုင်းတွင် စတုတ္ထမြောက်ကလေးဖြစ်သည့် Joseph ကို မွေးဖွားသည်။ [30] ဖခင်စတန်လေ ဥရောပကော်မရှင်တွင် အလုပ်အကိုင်တည်မြဲပြီးနောက် ယုကယ်မြို့နယ် ဘရပ်ဆဲလ်မြို့ (Uccle, Brussels)သို့ ၁၉၇၃ ဧပြီတွင် မိသားစုကိုပြောင်းရွှေ့ကာ ဂျွန်ဆင်သည် ဘရပ်ဆဲလ်အမှတ်(၁) ဥရောပကျောင်းသို့တက်ရောက် ပြင်သစ်စကားသင်ကြားသည်။ [31][32] ရပ်ဂ်ဘီအားကစား(rugby)အပေါ်နှစ်သက်လာပြီး ရှေးဟောင်းဂရိနှင့် လက်တင်စာပေများတွင်ထူးချွန်သည်။[33] ၁၉၇၈ ဒီဇင်ဘာတွင် မိဘနှစ်ဦးဆက်ဆံရေးအဆင်မပြေဖြစ်၍ ၁၉၈၀တွင်ကွာရှင်းကြသည်။[34]မိခင်ဖြစ်သူနှင့် သားသမီးများလိုက်နေ၏။[35]

ဂျွန်ဆင်သည် ကင်းကျောင်းမှ ပညာသင်ဆုရ၍ အက်တန်ကောလိပ်တွင်ပညာသင်ကြားခွင့်ကာ ထိုကောလိပ်မှာ ဘာ့ခ်ရှိုင်းယားက ဝင်ဆာအနီး အထက်တန်းစား ပုဂ္ဂလိကဘော်ဒါကျောင်းမျိုးဖြစ်သည်။ [36] ၎င်း၏ပထမနာမည် အဲလက်စ်အစား ဘောရစ်ဆိုသည့် စကားလုံးကိုစတင်သုံးစွဲ၍ သမားရိုးကျမဟုတ်သော အင်္ဂလိပ်စာ/စကားအရည်အသွေးကိုပျိုးထောင်ခဲ့ကာ ဤအချက်ကြောင့်ပင် သူသည် လူသိများကျော်ကြား၏။[37] မိခင်၏ ကသလစ်ခရစ်ယာန်ကို(Catholicism) စွန့်ခွာပြီး အိန်ဂျလစ်ကန်ခရစ်ယာန်(Anglican)ဖြစ်လာသောအခါ အင်္ဂလန်ခရစ်ယာန်ဘုရားရှိခိုးကျောင်းတော်ကြီး(the Church of England)တက်သည်။ အင်္ဂလိပ်စာနှင့် ဂန္ဓဝင်စာပေတွင်တော်သောကြောင့် နှစ်ဘာသာစလုံးတွင်ဆုများရရှိကာ [38] The Eton College Chronicleဟူခေါ်သော ကျောင်းသတင်းစာတွင် အယ်ဒီတာ[39]၊ ကျောင်းစကားရည်လုပွဲအဖွဲ့၏ အတွင်းရေးမှူးဖြစ်လာသည်။[40] အက်တန်ကျောင်းမှထွက်ပြီး ကြားတစ်နှစ်တွင် ဩစတေးလျသို့သွားကာ Outward Boundအဖွဲ့အစည်းမှ လှူဒါန်းထောက်ပံ့ပေးထားသော Geelong Grammaကျောင်းကြီးပရဝုဏ်အတွင်းရှိ အထက်တန်းစားပုဂ္ဂလိကပိုင် Timbertopကျောင်းတွင် အင်္ဂလိပ်နှင့် လက်တင်ဘာသာရပ်များသင်ကြားခဲ့သည်။ [41][42][43]

ဘောရစ် ဂျွန်ဆင် ဂန္ဓဝင်စာပေဖတ်ရှုခဲ့သော အောက်စ်ဖို့ဒ်၊ ဘောလီယိုကောလိပ်

ဂန္ထဝင်အတွေးအခေါ်များ၊ ရှေးဟောင်းစာပေ၊ ဂန္ထဝင်စာပေစသည်တို့ကို လေ့လာသင်ကြားရန် လေးနှစ်သင်တန်းသင်ရိုးဖြစ်သော (Literae Humaniores)ကို ဘောလီယိုကောလိပ်၌ တက်ရောက်ရန် ပညာသင်ဆုရခဲ့၏။[44] ၁၉၈၃နှောင်းပိုင်းတွင် ထိုကောလိပ်အောင်မြင်ပြီး[45] ဂျွန်ဆင်သည် နောက်ပိုင်း၌ ဗြိတိသျှနိုင်ငံရေးနှင့် သတင်းမီဒီယာလောကကို ၂၁ရာစု၏ ဒုတိယဆယ်စုနှစ်များတွင် လွှမ်းမိုးနိုင်သောအောက်စ်ဖို့ဒ်ကောလိပ်အဆင့်ကျောင်းသားများဖြစ်ကြသော ထိုသူတို့မှာ ဒေးဗစ် ကင်မရွန်း၊ ဝီလီယန် ဟေးဂ် (William Hague)၊ မိုက်ကယ် ဂို့ဗ် (Michael Gove)၊ ဂျရမီး ဟန့်တ် (Jeremy Hunt)၊ နစ်ဘိုးလ်စ် (Nick Boles) တို့ထဲမှတစ်ဦးဖြစ်သည်။ ၎င်းတို့အားလုံးမှာ ကွန်ဆာဗေးတစ်အကြီးတန်းပါတီဝင်နိုင်ငံရေးသမားများလည်းဖြစ်ကြသည်။[46] အောက်စ်ဖို့ဒ်တက္ကသိုလ်တွင် ရေပန်းစားထင်ရှားသည်။[47] ဂပ်ပီ(Guppy)နှင့်အတူ တက္ကသိုလ်၏ သရော်သောမဂ္ဂဇင်းဖြစ်သည့် Tributaryကို ပူးတွဲတည်းဖြတ်ခဲ့သည်။[48] ၁၉၈၄တွင် အောက်စ်ဖို့ဒ် သမဂ္ဂတွင် အတွင်းရေးမှူးအဖြစ်ရွေးချယ်ခံရကာ သမဂ္ဂဥက္ကဋ္ဌဖြစ်ရန်လှုပ်ရှားသည်။[49] အချိန်အတော်ကြာသည်အထိမအောင်မြင်ပဲ ၁၉၈၆တွင်မှ ဥက္ကဋ္ဌအဖြစ်ရွေးချယ်ခံခဲ့ရသည်။[50]

၁၉၈၇ စက်တင်ဘာတွင် ဂျွန်ဆင်နှင့် မို့စ်တန် အိုဝင်တို့ ရှရော့ရှိုင်းယား၊ ဝက်စ် ဖက်ဘ်တန်တွင် (West Felton, Shropshire)လက်ထပ်သည်။ ဂျာမန်တေးရေးဆရာHans Werner Henzeမှ မင်္ဂလာပွဲအတွက် အထူးစပ်ပေးထားသော တယောသေးနှင့်အလတ်နှစ်ခုတွဲဖြင့် တီးခတ်သည့် Allegra e Borisတေးသွားဖြင့် လက်ထပ်ပွဲတွင်တီးခတ်ခဲ့ကြသည်။ [51][52] မိသားစုအဆက်အသွယ်ဖြင့် တိုမ်းစ်သတင်းစာတွင်(The Times)ဘွဲ့ရအလုပ်သင်အဖြစ်လုပ်ကိုင်ခဲ့သည်။[53] ဒုတိယမြောက် အက်ဒ်ဝပ်ဘုရင်နန်းတော်ရာကို ရှေးဟောင်းသုသေသနဆိုင်ရာရှာဖွေမှုအကြောင်းဆောင်းပါးရေးရာတွင် အကိုးကားတစ်ခုကို လုပ်ကြံပြောဆိုရာ၌ ၎င်း၏ခေါင်းကိုင်ဖခင်(godfather) သမိုင်းပညာရှင် ကောလင်းလူးကပ်စ် (Colin Lucas)ဟု မှားယွင်းစွာဖော်ပြခဲ့သဖြင့် မကောင်းသတင်းထွက်ခဲ့၏။ အယ်ဒီတာချားလ်စ် ဝီလ်ဆန်သိသဖြင့် ရာထူးမှထူတ်ပယ်ခဲ့၏။[54] အောက်စဖို့ဒ် သမဂ္ဂဥက္ကဋ္ဌဖြစ်စဉ် ဒေးလီးတယ်လီဂရပ်ဖ်အယ်ဒီတာ မက်စ် ဟတ်စတင်းစ်(Max Hastings)ကို တွေ့ဆုံခဲ့ပြီး ထိုသတင်းစာတိုက်(The Daily Telegraph)တွင် ဦးဆောင်ရေးသားသောအဖွဲ့၌ အလုပ်ကိုင်မြဲခဲ့၏။[55] ၎င်းဆောင်းပါးများသည် အင်္ဂလန်အလယ်ပိုင်း သက်လတ်၊ အထက်တန်းစား ကွန်ဆာဗေးတစ်ဖတ်ရှုသူများအဖို့ စိတ်ကျေနပ်စရာဖြစ်ခဲ့ကာ[56] ၎င်း၏ ထင်ရှားစေသည့် စာပေဟန်၊ ရှေးစကားလုံး စကားစုများ ခပ်များများသုံးစွဲခြင်း၊ စာဖတ်ပရိတ်သတ်ကို သူငယ်ချင်းအပေါင်းရောင်းရင်းများ(my friends) ဟု ပုံမှန်သုံးစွဲသဖြင့် နာမည်ရလာသည်။[57] ၁၉၈၉ အစောပိုင်းတွင် ဂျွန်ဆင်အား ဘရပ်ဆဲလ်တိုက်ခွဲတွင် ဥရောပကော်မရှင်နှင့်ပတ်သက်၍ သတင်းထုတ်ပြန်ရေးသားရန် ခန့်အပ်သည်။ [58] ၁၉၉၄ထိ ထိုရာထူးတွင်ဆက်လက်လုပ်ကိုင်သည်။ [59]

ဥရောပပေါင်းစည်းရေးကော်မရှင်ဥက္ကဋ္ဌ ဂျက်ကွက်စ် ဒီလာ(Jacques Delors)ကို ပြင်းပြင်းထန်ထန်ဝေဖန်မှုတစ်ခုဖြင့် သူသည်ဘရပ်ဆဲလ်မြို့၏ ဥရောပသမဂ္ဂအပေါ်အယုံကြည်မရှိသော သတင်းထောက်အနည်းအကျဉ်းထဲမှ တစ်ယောက်ဖြစ်လာသည်။.[60] ဥရောပသမဂ္ဂအပေါ်ယုံကြည်ထောက်ခံသူ တိုရီပါတီဝင် ခရစ်ပတ်တန်(Chris Patte)က နောက်ပိုင်းတွင်ယခုလိုပြောကြားခဲ့၏။ အဲဒီတုန်းက ဂျွန်ဆင်ဟာ သတင်းတုသတင်းယောင်လုပ်တတ်တဲ့ အကြီးကျယ်ဆုံးသော သူတွေထဲက တစ်ယောက်ပဲ။[59] နောက်ပိုင်း ဂျွန်ဆင်၏အထုတ္တုပ္ပတ္တိရေးသားသူ ဆိုနီယာ ပါးနဲလ်(Sonia Purnell ) (ဂျွန်ဆင်၏ ဘရပ်ဆဲလ်သတင်းစာတိုက် လက်ထောက်)က [59] သူဟာလက်ယာဘက်သမားတွေအတွက် ဥရောပသမဂ္ဂအပေါ်အယုံကြည်မရှိဝါဒကို လှလှပပ စိတ်ညို့အားကောင်းကောင်းနဲ့ ပဲ့တင်ထပ်စေတဲ့အကြောင်းတရားဖြစ်စေခဲ့ပါတယ်။ တစ်ဖက်မှာတော့ အရင်ကဆို လက်ဝဲယိမ်းသမားတွေနဲ့ပဲ ဒီဝါဒက ပတ်သက်ခဲ့တာ ဟုဆိုခဲ့သည်။[61] ဂျွန်ဆင်၏ဆောင်းပါးများသည် ထိုစဉ်က ဝန်ကြီးချုပ် မာဂရက်သက်ချာကို အကြိုက်တွေ့စေ၍ ဝန်ကြီးချုပ်၏ အကြိုက်ဆုံး သတင်းသမားဖြစ်လာသည်။[62] ဂျွန်ဆင်၏ ဆောင်းပါးများသည် ကွန်ဆာဗေးတစ်ပါတီအကြား ဥရောပသမဂ္ဂအပေါ်ထောက်ခံသူနှင့် အမြင်မကြည်သူအဖွဲ့များကြားတင်းမာမှုများဖြစ်စေခဲ့ကာ ၁၉၉၇ ပါတီရွေးကောက်ပွဲ ရှုံးနိမ့်သောအခါ ဂျွန်ဆင်သည် များစွာသောပါတီဝင်များ၏ ယုံကြည်မှုကင်းမဲ့ခြင်းခံရလေသည်။[63] ၁၉၉၃တွင် ဇနီးသည် အယ်လီဂရာနှင့်ကွာရှင်းသည်။ [64] ၁၉၉၃ မေတွင် ငယ်သူငယ်ချင်းဖြစ်သူ မာရီနာ ဝီးလာနှင့်လက်ထပ်၏။[65] များမကြာမီ မာရီနာမှာ သမီးတစ်ယောက်မွေးဖွားသည်။[66] အစ်စ်လင်းတန်တွင်နေထိုင်စဉ် နောက်ထပ်ကလေးသုံးယောက် ထပ်ရ၏။ အားလုံး၏ ပထမအမည်ကို ဂျွန်ဆင်ဝီးလာ ဟူ၍ပေးထား၏။[67]

လန်ဒန်ကိုပြန်ရောက်လသည့်အခါ ဟတ်စတင်း(ဒေးလီးတယ်လီဂရပ်အယ်ဒီတာ)သည် ဂျွန်ဆင်၏ စစ်ပွဲရေးရာသတင်းထောက်(war reporter)ဖြစ်ရန် တောင်းဆိုမှုကို ငြင်းပယ်ခဲ့ပြီး[68] ထိုရာထူးအစား ၎င်း၏လက်ထောက်အယ်ဒီတာနှင့် အဓိကနိုင်ငံရေးဆောင်းပါးရှင်ရာထူးသို့တိုးမြှင့်ပေးခဲ့သည်။[69] နိုင်ငံရေးသဘောရေးရာစွယ်စုံရခြင်းနှင့် သိသာထင်းရှားစွာရေးသားနိုင်မှုတို့ကြောင့် ဂျွန်ဆင်၏ကော်လံမှာ ချီးကျူးခြင်းခံရသည်။ သတင်းစာများဘာတွေပြောနေသလဲ(The Papers Say the Award)ဆုပေးပွဲတွင် တစ်နှစ်တာ၏မှတ်ချက်ပြုရေးသားသူဆု(Commentator of the Year Award)ရရှိခဲ့သည်။[70] သူ၏အရေးအသားပုံစံကို ဝေဖန်ရေးသမားများက တစ်ယူသန်ဆန်လှသည်ဟု ရှုတ်ချကြသည်။ ဆောင်းပါးကော်လံအများပြားတွင် တွင်သူသည်အာဖရိကန်လူမျိုးများကိုရည်ညွှန်းရာ၌ လူမည်းကောင်လေးများ (piccannies, Wiktionary:my:pickaninny)” နှင့် ဖရဲသီးအပြုံးများ(watermelon smiles, Wiktionary:my:watermelon stereotype)ဟူသောစကားလုံးများကိုသုံးခဲ့သည်။ယူဂန်ဒါရှိ ဥရောပ၏ကိုလိုနီဝါဒကိုထောက်ခံခဲ့သည်။[71][72][73] လိင်တူအမျိုးသားများကို စွပ်ကျယ်ဝတ် ဟိုဟာလုပ်စားတဲ့ကောင်လေးများ ("tank-toped bumboys") ဟုရည်ညွှန်းသုံးစွဲသည်။[74]

ကွန်ဆာဗေးတစ် ဝန်ကြီးချုပ် ဂျွန်မေဂျာသည် ဂျွန်ဆင်ကို မနှစ်သက်၍ ၎င်းပါတီဝင်အဖြစ် အရွေးခံရာတွင် တားဆီးရန်စဉ်းစားခဲ့သည်

ရွေးချယ်ထားသော နိုင်ငံရေးလမ်းကြောင်းအပေါ် အသေအချာစဉ်းစားသုံးသပ်ရင်း ၁၉၉၃အရောက် ၎င်း၏ဆန္ဒဖြစ်သော ကွန်ဆာဗေးတစ်ပါတီဝင်တစ်ယောက်အဖြစ်ရပ်တည်၍ ၁၉၉၄ယူကေအတွက် ဥရောပသမဂ္ဂပါလီမန် အမတ်ရွေးကောက်ပွဲတွင်အမတ်ဖြစ်လိုသည်ဟုအကျဉ်းဖော်ပြခဲ့သည်(Member of the European Parliament - MEP)။ အန်ဒရူးမစ်ချယ် (Andrew Mitchell)က ဝန်ကြီးချုပ် မေဂျာကို ဂျွန်ဆင်၏ အမတ်ဝင်ရွေးခြင်းကို မတားမြစ်ရန်နားချသည်။ သို့သော် ဂျွန်ဆင်မှာ ရွေးကောက်ခံနယ်မြေ (မဲဆန္ဒနယ်) ရှာမရခဲ့ပါ။[75] နောက်ပိုင်း Clwyd South နယ်အတွက်ပါတီ၏ ကကိုယ်စားလှယ်လောင်းအဖြစ်ရွေးချယ်၍ ထိုနယ်မြေမှာ ထိုစဉ်က လေဘာပါတီ၏ အပိုင်စားနယ်မြေဖြစ်ရာ ၁၉၉၇ရွေးကောက်ပွဲတွင် လေဘာပါတီဝင်အားရှုံနိမ့်ခဲ့၏။[76]

တခြားသတင်းထောက်တစ်ဦးနှင့်ပတ်သက်သောကိစ္စတစ်ခုကို ၎င်းမိတ်ဆွေ ဒဲရီးယက်စ် ဂပ်ပီနှင့် တယ်လီဖုန်းပြောကြားသည်ကို လူသိရှင်ကြားထုတ်ဖော်ခံရသောအခါ ၁၉၉၅ ဇွန်တွင် ဂျွန်ဆင်၏ မကောင်းသတင်းအနံ့ထွက်ခဲ့သေးသည်။[77] ဟတ်စတင်းစ်က သိ၍ ဂျွန်ဆင်အားအပြစ်ပေးသော်လည်း အလုပ်မှ ထုတ်ပယ်ခြင်းမပြုလုပ်ခဲ့ပါ။[77] The Daily Telegraph ၏ အခြားထုတ်ဝေမှုတစ်ခုဖြစ်သော The Spectatorတွင်ပုံမှန် သတင်းကော်လံရသည်။[78]

ဘီဘီစီ၏ လက်ရှိဖြစ်ရပ်များကိုသရော်လှောင်ပြောင်သော အစီအစဉ်တွဲ(Got News for You)၏ ၁၉၉၈-ဧပြီ-အခန်းတွင် ပါဝင်လာကာ ၎င်း၏ လုံးလုံးထွေးထွေးစကားပြောတတ်သောပုံစံကြောင့် နိုင်ငံတဝှမ်းလူသိထင်ရှားဖြစ်လာသည်။ ကြည့်ရှုသူပရိသတ်က ဖျော်ဖြေမှုပေးအတော်လေးပေးနိုင်သည်ဟု မြင်ကြသည်။ နောက်ပိုင်းအစီအစဉ်များတွင်လည်း ဖိတ်ခေါ်ခံရ၍ ဧည့်သည်တင်ဆက်သူအဖြစ်ပါဝင်ခဲ့သေး၏။ [79]

၁၉၉၉ ဇူလိုင်၌ ဂျွန်ဆင်အားသူ၏ပါလီမန်ရည်မှန်းချက်များကိုစွန့်လွှတ်မည်ဆိုက The Daily Telegraph and The Spectator ပိုင်ရှင် ကောန်ရက်ဒ် ဘလက် (Conrad Black)က The Spectator၏ အယ်ဒီတာလုပ်ရန်ကမ်းလှမ်းရာ ၎င်းကသဘောတူခဲ့သည်။[80] ဂျွန်ဆင် အယ်ဒီတာလုပ်စဉ် မဂ္ဂဇင်းမှာ (ရောင်းအား ၁၀%တက်လာ၍) စောင်ရေ ၆၂၀၀၀ အထိတိုးလာသည်။ ထို့ကြောင့်အမြတ်အစွန်းလည်းရလာ၏။[81] ၎င်းအယ်ဒီတာလုပ်ဆောင်မှုအား ဝေဖန်မှုများရှိခဲ့သည်။ The Spectatorသည် တကယ့်အရေးကြီးကိစ္စများကိုလက်ရှောင်သည်ဟု တစ်ချို့ကဆိုသည်။[82] လုပ်ဖော်ကိုင်ဖက်များကသူသည် ရုံး၊ အစည်းအဝေးများနှင့်ပွဲများ ပုံမှန်ပျက်ကွက်လာခြင်းကြောင့် စိတ်တိုကြသည်။[83] မဂ္ဂဇင်း၌တလွဲနိုင်ငံရေးခန့်မှန်းချက်များကြောင့် နုံခြာသောနိုင်ငံရေးပါရဂူကြီးဟု နာမည်ဆိုးရလာခဲ့သည်။[82] The Spectatorဆောင်းပါးရှင် တက်ကီ သီယာဒေါရကပလ(စ်)(Taki Theodoracopulos)အား လူမျိုးရေးခွဲခြားမှု နှင့် ဂျူးလူမျိုးများအပေါ်အမုန်းပွားစေသော စကားလုံးများထည့်သွင်းခွင့်ပြုသည့်အတွက် သူ့ယောက္ခမချားလ်စ်ဝီလာအပါအဝင် အတော်များများက ပြင်းပြင်းထန်ထန်ဝေဖန်ခဲ့ကြ၏။[84][85]

ဂျာနယ်လစ် ရှားလက် အက်ဒ်ဝပ်(Charlotte Edwardes) က ၁၉၉၉ခုနှစ်တွင်ဂျွန်ဆင်သည် Spectator ၏ရုံးခန်းထဲ၌သီးသန့်နေ့လယ်စာ စားချိန်ဝယ် သူမ၏ပေါင်ကိုညှစ်သည်ဟု ၂၀၀၉၌ စွပ်စွဲသည်။နောက်ထပ်အမျိုးသမီးတစ်ဦး ကလည်းသူမအားအလားတူမျိုးပြုလုပ်ခဲ့သည်ဟုစွပ်စွဲခဲ့ရာ ဒေါင်းနင်းလမ်းပြောရေးဆိုခွင့်ရှိသူက ထိုစွပ်စွဲချက်ကိုငြင်းဆိုခဲ့သည်။[86]

ရောမသားတို့ အိပ်မက်များ ဟုခေါ်သော ရောမအင်ပါယာအကြောင်းရေးသားထားသည့် ၂၀၀၅ခုထွက်စာအုပ်၏ နောက်ပိုင်းထုတ်ဝေသည့်ရိုက်နှိက်ချက်နောက်ဆက်တွဲတွင်ဂျွန်ဆင်က အစ္စလာမ်ဘာသာသည်မွတ်စလင်ကမ္ဘာအား အနောက်ဘက်(ဥရောပကိုဆိုလို)တွင် "ရာစုနှစ်များစွာနောက်ကျစေခဲ့သည်ဟုပြောဆိုခဲ့သဖြင့် ဝေဖန်ခံခဲ့ရ၏။[87]

မိုက်ကယ် ဟက်ဆယ်လ်တိုင်း(Michael Heseltine)အနားယူပြီးနောက် ကွန်ဆာဗေးတစ်ပါတီ၏ အခိုင်အမာနယ်ဖြစ်သော အောက်စဖို့ဒ်၊ ဟန်လေနယ်မြေ၏ အမတ်လောင်းဖြစ်ရန် ဆုံးဖြတ်ခဲ့သည်။[89] တစ်ချို့ပါတီဝင်များကနှစ်သက်၍ တစ်ချို့က ၎င်း၏အလေးအနက်မထားခြင်း၊ ဒေသအပေါ် ဗဟုသုတမရှိခြင်းအတွက် မနှစ်မြို့ကြပေ။[90] ၂၀၀၁ ရွေးကောက်ပွဲတွင် အများစုမဲ၈၅၀၀ဖြင့်နိုင်ခဲ့သည်။[91]

ပါလီမန်တွင် ဂျွန်ဆင်အား ရာဇဝတ်ပြစ်မှုဥပဒေကြမ်းများကို လုပ်ဆောင်ရသော အမြဲတမ်းကော်မတီတွင် နေရာရသည်။ သို့သော် အစည်းဝေးအတော်များများမတက်မိဘဲ လွတ်သည်။ လူသူရှေ့ စကားပြောသူအဖြစ် သင့်လျော်သောအရည်အချင်းရှိလည်းပဲ အောက်လွှတ်တော်တွင်ပြောသော စကားများမှာ အသက်မပါလှဟု အများကဝေဖန်ရာ နောက်ပိုင်းတွင် ထိုသူတို့ကို မစင်ကောင်များဟု ခေါ်ဝေါ်ခဲ့သည်။[92] မထောက်ခံပါဘူးဟု အစောပိုင်းပြောသော်လည်း ၂၀၀၃အီရတ်စစ်ပွဲကို အမေရိကန်နှင့် ပူးပေါင်းတိုက်ခိုက်ရန် ယူကေပါဝင်မည့်အရေးအားမဲပေးခဲ့၏။[93] ၂၀၀၄ ဩဂုတ်လတွင် လေဘာဝန်ကြီးချုပ် တိုနီဘလဲကို စစ်ပွဲနှင့်ပတ်သက်၍ ရာဇဝတ်မှု ကြီးငယ်ကျူးလွန်သည်ဟု ရာထူးမှဖယ်ရှားရန် မအောင်မြင်သောကြိုးပမ်းမှုများတွင် ထောက်ခံခဲ့၏။ [94]

လွှတ်အမတ်မဖြစ်ဖို့ ကတိစကားချိုးဖောက်သောကြောင့် သူ့အား လူလိမ်ဟူ၍ တံဆိပ်တပ်သော်လည်း ဘလက်မှာ မဂ္ဂဇင်းစောင်ရေတိုးစေရန်ကူညီထားသော ဂျွန်ဆင်ကို အလုပ်မဖြုတ်ခဲ့ပေ။[95] 'The Spectatorအယ်ဒီတာဆက်လုပ်ရင်း The Daily Telegraph and GQ တို့အတွက် သတင်းများရေးသားကာ တီဗီပေါ်တွင်လည်းပါလာတတ်သည်။[96]စာအုပ်များရေးသားထုတ်ဝေသည်။ ၂၀၀၄၌ ပထမဆုံးလုံးချင်းဝတ္ထုဖြစ်သည့် ၇၂ အပျိုစင်များ : အလွဲများ၏ ဟာသ(Seventy-Two Virgins: A Comedy of Errors)ကို ထုတ်ဝေသည်။[97] အလုပ်ပေါင်းစုံအောင်လုပ်သည်ဟု ဝေဖန်ရေးသမားများကို တုံ့ပြန်ရာတွင် ဝင်စတန် ချာချီ နှင့် ဘင်ဂျမင် ဒစ်(စ်)ရေးလီ ကို ကိုးကားကာ ၎င်းဝန်ကြီးချုပ်နှစ်ဦးမှာလည်း စာပေပိုင်းရော နိုင်ငံရေးပိုင်းပါလုပ်ကိုင်ကြသည်ဟု ပြောဆိုခဲ့သည်။[98] စိတ်ဖိဆီးမှုများကို ကျော်လွှားရန် စက်ဘီးစီးသည်။ အနှေးပြေးသည်။[99]

၂၀၀၄ နိုဝင်ဘာတွင် တက်ဘလွိုက်သတင်းစာများက ထုတ်ဖော်ရေးသားသည်မှာ သက္ကရာဇ် ၂၀၀၀ကတည်းက ဂျွန်ဆင်နှင့်Spectator ဆောင်းပါးရှင်တစ်ဦးဖြစ်သော ပက်ထရိုနယ်လာ ဝယီးယတ်(Petronella Wyatt])တို့ ချစ်ဇာတ်လမ်းများရှိခဲ့ကြပြီး ကိုယ်ဝင်နှစ်ကြိမ်ဖျက်ချသည်အထိ ဖြစ်ခဲ့ကြသည်။ ဂျွန်ဆင်သည် ထိုပြောဆိုမှုများကို အခြေမြစ်မရှိဟု ပြောကြားခဲ့၏။[100] စွပ်စွဲမှုများကို သက်သေပြပြီးနောက် မိုက်ကယ် ဟိုးဝက်(Howard)က ပါတီ၏ အတိုက်အခံအစိုးရအဖွဲ့နောက်ယောင်ခံ အနုပညာယဉ်ကျေးမှုဝန်ကြီး(shadow arts minister) နှင့် ပါတီဒုခေါင်းဆောင်နေရာမှ ထွက်ရန်ပြောသည်။ ဂျွန်ဆင်မှ ငြင်းဆိုသဖြင့် ရာထူးမှဖယ်ရှားခဲ့သည်။[101][102] ထိုအပုတ်ဇာတ်လမ်းကို သရော်သောအားဖြင့် ဖေဖေ ဘယ်သူလဲ(Who's the Daddy?)ဆိုသောပြဇာတ်တစ်ခုတွင် ဇာတ်ရုံလောကဝေဖန်ရေးသမားနှစ်ဦးက အစ်(စ်)လင်တန်ရှိ ကင်းဟတ်ဇာတ်ရုံတွင် ဖျော်ဖြေခဲ့ကြသည်။[103]

အဆင့်မြင့်ပညာရေးအတိုက်အခံဝန်ကြီးအနေဖြင့် ဂျွန်ဆင်တက္ကသိုလ်များသို့သွားရောက်( ဤပုံတွင် နော်တင်ဟမ်တက္ကသိုလ်) 2006)

၂၀၀၅ ရွေးကောက်ပွဲကြီးတွင် ဟန်လေမဲဆန္ဒနယ်အတွက် ထပ်မံအရွေးခံရ၍[104] လေဘာပါတီနိုင်ကာ ဟိုးဝပ် ကွန်ဆာဗေးတစ်ပါတီခေါင်ဆောင်အဖြစ်မှ နှုတ်ထွက်သည်။ [[ဒေးဗစ် ကင်မရွန်|ဒေးဗစ်ကင်မရွန်း]ကိုဆက်ခံသူ ခေါင်းဆောင်အဖြစ် ထောက်ခံခဲ့သည်။[105] ကင်မရွန်း အရွေးခံပြီးနောက် ဂျွန်ဆင်အား ကျောင်းသား/သူများအကြား ၎င်း၏ ရေပန်းစားမှုကို အသိမှတ်ပြုရင်း အဆင့်မြင့်ပညာရေးအတိုက်အခံဝန်ကြီးအဖြစ်ခန့်အပ်ခဲ့သည်။ ​၂၀၀၆ ဧပြီ၌ the News of the Worldသတင်းစာက ဂျွန်ဆင်သည် သတင်းထောက်Anna Fazackerleyနှင့်လည်း ဇာတ်လမ်းများရှိသည်ဟု စွပ်စွဲရာ နှစ်ဦးစလုံးမှာ မှတ်ချက်ပြောဆိုရန် ငြင်းဆန်ခဲ့၏။ များမကြာမီ Fazackerleyကိုစတင် အလုပ်ခန့်ထားခိုင်းစေခဲ့၏။[106][107] ၂၀၀၆ စက်တင်ဘာတွင် ၎င်းသည် ပါပူဝါနယူးဂီနီရှိ ကွန်ဆာဗေးတစ်ခေါင်းဆောင်ခဏခဏပြောင်းသည်ကို ဇာတ်တူသားစားသုံးခြင်း(cannibalism)ဟု နှိုင်းယှဉ်ပြောဆိုသဖြင့် ထိုသံရုံးက ကန့်ကွက်ခဲ့၏။[108] ၂၀၀၅၌ The Spectator ၏အမှုဆောင်ချုပ်အသစ် အန်ဒရူးနေးလ်က သူ့အားအယ်ဒီတာရာထူးမှ ထုတ်ပယ်ခဲ့သည်။[109]

၂၀၀၇ မတ်လတွင် လာမည့် ၂၀၀၈မြို့တော်ဝန် ရွေးကောက်ပွဲ၌ လန်ဒန်မြို့တော်ဝန်အဖြစ်ပါဝင်ယှဉ်ပြိုင်ရန် အဆိုပြုသည်။ [110] ကွန်ဆာဗေးတစ်အများစုမှာ နစ်ဘိုးလ်စ်(Nick Boles)ကိုသာ အလေးပေး၍ ဂျွန်ဆင်ကို လေးနက်မထားခဲ့ပေ။[111] ဘိုးလ်စ်နှုတ်ထွက်ပြီး ဂျွန်ဆင်မှာ ကင်မရွန်း၏ ထောက်ခံမှုရရ[112] ဇူလိုင်တွင် ပြိုင်ဆိုင်မည်ဟုကြေငြာခဲ့သည်။[113][114]

အကယ်၍ မြို့တော်ဝန်အဖြစ်အရွေးခံရပါက ဂျွန်ဆင်သည် မြို့၏တွဲဆက်ဘတ်စ်ကားများနေရာ၌ New Routemasterဖြင့်အစားထိုးပေးမည်ဟု ကတိပေး။

မြို့တော်ဝန်ဖြစ်မြောက်ရေးလှုံ့ဆော်ရာတွင် ဘတ်စ်ကားအသစ်များအစားထိုးခြင်း၊ ပြည်သူ့ပို့ဆောင်ရေးစနစ်အား လုံခြုံမှုရှိစေရန်ပြုလုပ်ခြင်း၊ လူငယ်များရာဇဝတ်ပြစ်မှုလျော့ကျစေရန်ဆောင်ရွက်ခြင်း စသည်တို့ကိုအာရုံထားအလေးစိုက်ခဲ့၏။[115] ပြင်းထန်၍နာတာရှည် ရောဂါနာကျင်မှုများကိုသက်သာစေရန် ဆေးခြောက်(ကျန်းမာရေးအတွက်) သုံးစွဲခြင်းဥပဒေကို ပို၍အဆင်ပြေစေရန် မဲဆွယ်လှုံဆော်မှုပြုရာတွင်ထောက်ခံပြောဆိုသည်။ [116] မဲပေးသူများအကြားပြောကြသည်မှာ " တို့တော့ ဘောရစ်ကိုပဲ မဲပေးမယ်ကွာ ဘာလို့လဲဆိုတော့ သူကရယ်ရတယ်" ဆိုသော တူညီသည့်သဘောထားကို ပြိုင်ဘက်များက ညည်းညူမှုများနှင့်အတူ ဂျွန်ဆင်၏ မဲဆွယ်လှုံ့ဆော်မှုသည် ၎င်း၏မူဝါဒကိုမထောက်ခံသူများအကြား၌ပင် သူ၏ကျော်ကြားမှုကိုတိုးပွားစေခဲ့၏။[117][115]

ထိုစဉ်က လက်ရှိမြို့တော်ဝန် (လေဘာပါတီ) Ken Livingstoneကမူ ဂျွန်ဆင်ကို အလေးအနက်ထားပြီး သူ့ရဲ့ နိုင်ငံရေးသမားဘဝတစ်လျှောက်လုံးမှာ ဂျွန်ဆင်ဟာ ကြောက်စရာအကောင်းဆုံးသူဖြစ်သည်ဟု ရည်ညွှန်းဖူးသည်။ [118] စုစုပေါင်းအနေဖြင့် နောက်ဆုံးတွင် ဘောရစ်က ၅၃% ၊ Livingstoneက ၄၇%ရရှိ၍ အနိုင်ရသည်။[119][120]ဟန်လေနယ် အမတ်ဖြစ်မှ နှုတ်ထွက်ခဲ့သည်။ [121][122]

လန်ဒန်မြို့တော်ခန်းမ မြို့တော်ဝန်ရုံးသို့ဝင်လာသောအခါ ပထမဆုံးတရားဝင်ပါဝင်ရသည်မှာ ထွာဖာလ်ဂါရင်ပြင်(Trafalgar Square) ၌ ဆစ်ခ်ဘာသာရေးပွဲ ဝိသာခီပွဲ(Vaisakhi)ကျင်းပမှုပင်ဖြစ်သည်။[123][124] Tim Parkerကို ဒုမြို့တော်ဝင်ခန့်သော်လည်း ရုံးတွင်းပြဿနာတစ်ချို့ကြောင့် ပြန်လည်ဖြုတ်ခဲ့သည်။[125]

လန်ဒန်မြို့တော်ခန်းမ၌ မြို့တော်ဝန်အဖြစ်အရွေးခံရသောအခါ မိန့်ခွန်းပြောနေပုံ

ဂျွန်ဆင်နှင့်မြိုပြအုပ်ချုပ်ရေးအဖွဲ New Routemasterဘတ်စ်ကားများအားမတ်ဆက်ခြင်း။

ယခင်က Livingstone တိုးတက်အောင်ပြုလုပ်ထားသော မြို့တော်ဝန် နှင့်ပတ်သက်သော အဓိကအပြောင်းအလဲများကို ပြုလုပ်ခဲ့ခြင်းမရှိပဲ ယခင်မြို့ပြအုပ်ချုပ်ရေးအဖွဲ့ အကောင်ထည်ဖော်ထားသော လုပ်ဆောင်ချက်များကို ပြန်လည်ပြောင်းပစ်သည်။ [126] လန်ဒန်မြို့ လူကျပ်သောနေရာသို့ မော်တော်ယာဉ်များမောင်းလျှင် အခွန်ကောက်ခံမှုနယ်မြေ အနောက်ဘက်သို့တိုးချဲ့မည့် အစီအစဉ်ကို ဖျက်သိမ်းသည်။[127] လေးဘီးစလုံးရုံး၍မောင်းသောကားများ (four-wheel-drive vehicles)အပေါ် အထက်ပါအခွန်တိုးကောက်မည်ကိုလည်း ဖျက်သိမ်းခဲ့၏။[128] Livingstoneစီစဉ်ထားသော ၂၀၁၂-နွေရာသီ အိုလံပစ်အတွက်လုပ်ငန်းများ၊ မီးရထားဖြတ်လမ်းလုပ်ငန်းများကို ဆက်လက်လုပ်ကိုင်ခဲ့သည်။ သို့သော် နာမည်ကောင်းယူသည်ဟု စွပ်စွဲခံရသည်။[129] ယခင်မြို့တော်အုပ်ချုပ်ရေးအဖွဲ့အဆိုပြုထားသော ပြည်သူ့စက်ဘီးငှားရန်းခြင်းစီစဉ်မှုကို မိတ်ဆက်အကောင်ထည်ဖော်ခဲ့၏။ ဘောရစ်စက်ဘီးများဟု လူသိများခဲ့လေသည်။ မြို့ရွေးကောက်ပွဲကတိအတိုင်း မြို့လည်ခေါင် ဘတ်စ်ကားများကိုလည်း မိတ်ဆက်ခဲ့ကာ သိမ်းစ်မြစ်ကို ဖြတ်သန်းပို့ဆောင်မည့် ကောင်းကင်ကြိုးနှင့်မောင်းနှင်မည့် အမ်းမရိတ်လေကြောင်းကတည်ဆောက်သော ကေဘယ်လ်ကားလုပ်ငန်းတည်ဆောက်မှုကို အကောင်ထည်ဖော်၏။[130][131]

စတန်ဒါ သို့ ဘောရစ်စက်ဘီးများ ကို အကောင်ထည်ဖော်ခြင်း

၎င်း၏ ပထမဆုံးမူဝါဒမှာ ပြည်သူ့ပို့ဆောင်ရေးနေရာများတွင် အရက်သေစာသောက်သုံးခြင်းကို တားမြစ်သည်။[132][133] လန်ဒန် မီးရထားဝန်ဆောင်မှု၌ ကြိုက်သလောက်သွားကျသလောက်ပေး Oyster cardစနစ်ကို ချဲ့ထွင်ရန်ကြေငြာသည်။[134] ၂၀၁၃ နိုဝင်ဘာ၌ လန်ဒန်ပို့ဆောင်ရေးမှ ၂၀၁၅တွင် မြေအောက်ရထား လက်မှတ်ရုံများပိတ်မည်ဟု ကြေငြာခဲ့သည်။[135] ဤလုပ်ငန်းများကို အကောင်အထည်ဖော်ရန် ဂျွန်ဆင်၏ စည်ပင်အဖွဲ့မှာ ပေါင် သန်း(၁၀၀)ချေးငွေရယူခဲ့ရပြီး ပို့ဆောင်ရေးအဖိုးခမှာ ၅၀%မြင့်တက်သွား၏။[136][137] ပတမသက်တမ်းအတွင်း တစ်ချို့ကိစ္စများကို လက်ဝဲယိမ်းသည့် အနေထားဖြင့် ဆောင်ရွက်ရသည်များလည်းရှိခဲ့ရာ ဥပမာ။ ။ လန်ဒန်တွင် အနည်းဆုံးလုပ်ခကိစ္စရပ်၊ တရားမဝင် နိုင်ငံကူးပြောင်းသူများကို ထောက်ခံခဲ့ရလေသည်။[138] အခြားနိုင်ငံရွေးကောက်ပွဲအပေါ်လူသိထင်ရှား မှတ်ချက်ပြုလေ့မရှိသောလုပ်ထုံးလုပ်နည်းများကို သွေဖယ်ကာ အမေရိကန်ရွေးကောက်ပွဲတွင် ဘားရက် အိုဘားမားအနိုင်ရခဲ့သည်ကို ထောက်ခံခဲ့၏။[139][140]

တစ်ဖက်တွင် Livingstone၏ ပို့ဆောင်ဆက်သွယ်ရေးအပေါ် လူကြိုက်များသော်လည်း ဂျွန်ဆင်၏ ရာဇဝတ်မှုနှင့် စီပွားရေးမူများကို ပို၍ယုံကြည်လာခဲ့သာ်ဟု မဲများကညွှန်းဆိုနေသည်။ [141] ဤတစ်ကြိမ်တွင်လည်း လေဘာပါတီဘက်မှ ပြိုင်ဘက်မှာ Livingstoneပင်ဖြစ်ရာ ၎င်းမဲဆွယ်ပွဲ၌ Livingstoneသည် အခွန်ရှောင်သည်ဟု စွပ်စွဲသဖြင့် Livingstoneကလည်း ၎င်းကို မျက်နှာပြောင်လူလိမ်ဟု ပြန်လည်ပြောဆိုခဲ့၏။[142] ၂၀၁၂ တွင် ဂျွန်ဆင်သည် လန်ဒန်မြို့တော်ဝန်အဖြစ်ပြန်လည်တင်မြောက်ခြင်းခံရသည်။[143]

၂၀၁၂ နွေရာသီ အိုလံပစ်ပွဲရှိ ဂျွန်ဆင်

၂၀၁၂ နွေရာသီ အိုလံပစ်ပွဲအတွက် လုပ်ဆောင်ချက်နှစ်ခုမှာ လန်ဒန်တွင်ပို့ဆောင်ရေးများကောင်းမွန်လာစေရန်၊ ပွဲတော်အတွင်းလာရောက်သူများရှိနေစဉ်ဘတ်စ်ကားများ ပိုမိုရနိုင်စေရန်တို့ဖြစ်သည်။[144][145]

၂၀၁၄တွင် ဝင်စတန်ချာချီနှင့်ပတ်သက်၍ ၎င်း၏အထုပ္ပတ္တိ "ချာချီ၏ ဆခွဲကိန်း" (The Churchill Factor)စာအုပ်ကို ဂျွန်ဆင်သည်မည်သို့မည်ပုံ မိမိကိုယ်တိုင် ချာချီနှင့်ထပ်တလဲလဲနှိုင်းယှဉ်မှုများကိုအလေးပေးခဲ့သော မီဒီယာများနှင့်အတူရောင်းအားမြှင့်ခဲ့သည်။ [146] တတိယသက်တမ်းအတွက်ဝင်ရောက်ခြင်းမရှိတော့ဘဲ ၂၀၁၆ မေ ၅ရက်တွင် ရာထူးမှထွက်ခဲ့သည်။

ဘရက်ဇစ် Brexit သို့ Brixit (IPA /ˈbrɛksɪt, ˈbrɛɡzɪt/) အရှည်စကားလုံး - BRITISH Exit ( the withdrawal of the United Kingdom (UK) from the European Union (EU)) ဟု Bri နှင့် Exit အသံကို ရောနှောခေါ်ဆိုသော ဝေါဟာရဖြစ်သည်။ အဓိပ္ပါယ်မှာ ယူနိုက်တက်ကင်းဒန်းနိုင်ငံဥရောပ သမဂ္ဂမှ ထွက်ခွာခြင်း။Brexit

ဂျွန်ဆင်သည် ၂၀၁၆ ဖေဖော်ဝါရီ ၌ ဥရောပ သမဂ္ဂအဖွဲ့ဝင်နိုင်ငံအဖြစ်မှ ယူကေထွက်ခွာခြင်းအရေးနှင့် ပတ်သက်သော "ထွက်" လှုံ့ဆော်စည်းရုံးရေးတွင် ထွက်ခွာမည့် ဘက်က လှုပ်ရှားထောက်ခံသည်။[152] ကင်မရွန်း၏ ထွက်ခွာခြင်းအပေါ် သတိပေးချက်များကို ပုံကြီးချဲ့လွန်းသည်ဟုဆိုခဲ့သည်။ စီးပွားရေးဈေးကွက်များ၏ ထုတ်ဖော်ဘာသာပြန်ချက်များအပြီးတွင် ပေါင်စတာလင် ငွေကြေးမှာ ၂၀၀၉ မတ်လမှစ၍ ယူအက်စ် ဒေါ်လာနှင့်ယှဉ်လျှင် ၂%ခန့် အတော်ကြီးကျဆင်းသွားရာ အနိမ့်ဆုံးအနေထားသို့ရောက်သွားသည်။ [153]

မန်ချက်စတာမြို့ ဘရက်ဇစ်ဆန့်ကျင်ရေး၌ သုံးထားသော တိုရီပါတီ အဖွဲ့ဝင်လေးဦး၏ပုံ လေထိုးရုပ်။ ထိုလေးဦးမှာ ဘောရစ် ဂျွန်ဆင်၊ဒေးဗစ်(စ်) ဒေးဗစ်(ဒ်)၊မိုက်ကယ် ဂို့ဗ်၊ထရီဇာ မေ တို့ဖြစ်ကြ၏။

၂၀၀၆ ဧပြီ ယူကေမှ " The Sun"သတင်းစာဆောင်းပါးတစ်ခုတွင် အိုဘားမား၏ ပြောဆိုမှုဖြစ်သော ယူကေသည် ဥရောပ သမဂ္ဂ၌သာဆက်နေသင့်သည်ဆိုခြင်းကို ဂျွန်ဆင်က အိုဘားမား၏အမြင်များမှာ တစ်စိတ်တစ်ဒေသအားဖြင့်ကင်ညာနှင့်နောက်ခံပတ်သတ်မှုရှိသောကြောင့် ၎င်းရှေးဘိုးဘွားတို့၏ ဗြိတိသျှအပေါ်မကျေချမ်းခြင်းများနှင့် ရုပ်လုံးဖော်ထားသည်ဟု တုံ့ပြန်ခဲ့သည်။[154]

၂၀၁၆ ဇွန် ၂၂ ဝင်ဘာလေအားကစားရုံကြီး၌ ပရိတ်သတ် ၆၀၀၀ရှေ့ ရုပ်မြင်သံကြားမှလွှင့်သော အခြေတင်စကားရည်လုပွဲဝယ် ၂၃ ဇွန်သည် ဗြိတိန်၏ လွတ်မြောက်ရေးနေ့ဖြစ်နိုင်ကြောင်း ဂျွန်ဆင်ကပြောဆိုခဲ့၏။[155] ဝန်ကြီးချုပ် ဒေးဗစ်ကင်မရွန်းက ကျွန်တော်တို့တိုင်းပြည် မလွတ်လပ်ဘူးဟူသော စိတ်ကူးဆိုတာကတော့ အဓိပ္ပါယ်မရှိလှပါဘူးဟု ဂျွန်ဆင်၏ ပြောဆိုခြင်းကို တုံ့ပြန်ခဲ့ပြီး ဒီစကားရည်လုပွဲတစ်ခုလုံးက ဒီနိုင်ငံရဲ့ အချုပ်ခြာအာဏာကို သရုပ်ဖော်ပါတယ်ဟု ထုတ်ဖော်ပြောကြားသွားခဲ့သည်။[156]

ထွက်ခွာရန်စည်းရုံးလှုံ့ဆော်မှုများအောင်မြင်လာခဲ့အပြီးနောက် ကင်မရွန်းနှုတ်ထွက်သည်။ ဂျွန်ဆင်ကို ၎င်း၏နေရာ၌ ဆက်ခံရန် ဦးဆောင်သူဟု ကျယ်ကျယ်ပြန့်ပြန့်ယူဆခဲ့ကြသည်။[157][158] သို့သော် ၎င်းသည် ကွန်ဆာဗေးတစ်ပါတီခေါင်းဆောင်ရွေးချယ်ပွဲ၌ ပါဝင်မည်မဟုတ်ဟု ကြေငြာခဲ့သည်။[159] များမကြာမီ ထိုစဉ်က ဂျွန်ဆင်၏ မဟာမိတ်ဖြစ်သော မိုက်ကယ်ဂို့ဗ်က ဂျွန်ဆင်သည် ခေါင်းဆောင်မှုကို မထောက်ပံ့နိုင်ကြောင်း၊ ရှေ့လာမည့် လုပ်ငန်းတာဝန်များအတွက် အဖွဲ့ကို မတည်ဆောက်နိုင်ကြောင်း သုံးသပ်ခဲ့၏။[160][161][162] ဂျွန်ဆင်က ပါတီခေါင်းဆောင်အဖြစ် Andrea Leadso၏ အရွေးခံခြင်းကို ထောက်ခံသော်လည်း သူမမှာ တစ်ပတ်အကြာ၌ ထွက်ခွာခဲ့ရာ ပြိုင်စရာမလိုပဲ ထရီဇာ မေ ခေါင်းဆောင်ဖြစ်လာ၏။[163]

၂၀၁၇ ကုလသမဂ္ဂညီလာခံတွင် သမ္မတ ထရမ့်နှင့်အတူ

၂၀၁၇ ဒီဇင်ဘာ၌ အီရန်နိုင်ငံခြားရေးဝန်ကြီ မိုဟာမက် ဂျားဗတ် ဇာရစ်ဖ်နှင့် တွေ့ဆုံပုံ

အီယာမာဟာရီကိန်း တိုက်ခတ်အပြီး ဗြိတိသျှအပျိုစင်ကျွန်းသို့ သွားရောက်လည်ပတ်ခြင်း

ကွန်ဆာဗေးတစ်ပါတီခေါင်းဆောင် နှင့် ဝန်ကြီးချုပ်အဖြစ် ထရီဇာ မေဖြစ်လာသောအခါ ၂၀၁၆ ဇူလိုင်၌ ဂျွန်ဆင်ကို နိုင်ငံခြားရေးဝန်ကြီးခန့်သည်။[164] စစ်တမ်းများအရ ၎င်းကို နိုင်ငံခြားရေးဝန်ကြီး ခန့်အပ်ခြင်းသည် ဗျူဟာအရ ၎င်းကိုနိုင်ငံရေးအရ အားပျော့သွားစေသည်။ အဘယ်ကြောင့်ဆိုသော် ဘရက်ဇစ်ရေးရာဝန်ကြီး(Brexit Secretary) နှင့် နိုင်ငံတကာကုန်သွယ်ရေးဝန်ကြီး(International Trade Secretary)ဟူသော ရာထူးအသစ်နှစ်ခုကို တီထွင်လိုက်ခြင်းသည် နိုင်ငံခြားရေးဝန်ကြီးကို(Foreign Secretary ) အာဏာပါဝါသိပ်မရှိလှသော ပြယုတ်သာသာဖြစ်သွားစေသောကြောင့်ပင်ဖြစ်၏။[164][165] နိုင်ငံခြားရေးဝန်ကြီးဖြစ်သောကြောင့် ပြည်ပခဏခဏဆိုသလိုထွက်ခွာသွားလာရသည့်အတွက် ထရီဇာ မေက သူမကို ဆန့်ကျင်နိုင်သော ပါလီမန် နောက်တန်းထိုင်ခုံကသူများ(Backbenckers)ကို စုစည်းပြီး မဆွယ်နိုင်တော့ပေ။ တစ်ဖက်တွင်လည်း အီးယူမှထွက်ခွာခြင်းကြောင့် ဖြစ်လာနိုင်သော တာဝန်များကိုင်တွယ်စေရန် ခိုင်းစေသည်။[166][167] ဂျွန်ဆင်အား နိုင်ငံခြားရေးဝန်ကြီးခန့်အပ်သောကြောင့် အမေရိကန်ပြည်ထောင်စုသည် ယူကေ-ယူအက်စ် ဆက်ဆံရေးအက်ကွဲနိုင်ပြီး ဂျာမနီနှင့်ဆက်ဆံရေးတိုးဖွယ်ရာရှိသည်ဟု အိုဘားမားအစိုးရအဖွဲ့က ညွှန်းဆိုခဲ့သည်။[168] တူရကီ ဥရောပ သမဂ္ဂသို့ ဝင်ရောက်နိုင်ရေးကို ကူညီပေးမည်ဟု ကတိပေးခဲ့ပြီး တူရကီသမ္မတ အာဒိုဂန်အစိုးရအဖွဲ့ကို ထောက်ခံကြောင်းဖော်ပြသွားခဲ့၏။[169] ယီမင်ပြဿနာကို ဆော်ဒီဦးဆောင်၍ လှုပ်ရှားသည်ကို ထောက်ခံကာ ဆော်ဒီနိုင်ငံသို့ ယူကေလက်နက်များ ပိတ်ပင်တားဆီးမည်ကို ငြင်းဆိုခဲ့လေသည်။ [170]

ယူအက်စ်၊ယူကေ၊ဆော်ဒီ၊ ယူအေအီးမှ နိုင်ငံခြားရေးဝန်ကြီးများ ယီမင်အရေးဆွေးနွေးခြင်း အလုပ်သဘောညစာစားပွဲမတိုင်ခင်၊ ဇူလိုင် ၂၀၁၆

​အီးယူမှ ထွက်ခွာပြီးလျှင်လည်း ဗြိတိသျှပိုင်နက်ဂျီဘရော့တာအချုပ်ခြာမှာ လုံးဝပြောင်းလဲသွားမည်မဟုတ်ကောင်း ဧပြီ ၂၀၁၇ တွင်ဂျွန်ဆင်ကပြောဆိုခဲ့ကာ[171] နောက်ထပ်ကတိပေးခဲ့သည်မှာ အိုင်ယာလန်နယ်စပ်သည်လည်း လုံးဝပြောင်းလဲခြင်းမရှိ နဂိုအတိုင်းပဲ ကျန်ရစ်မည်ဟု မြောက်အိုင်ယာလန်တွင် ရောက်စဉ်ပြောကြားသွားသည်။[172] ၂၀၁၇ စက်တင်ဘာတွင် မြန်မာနိုင်ငံသို့လာရောက်ခဲ့ပြီး ဂျိုးဇက် ရပ်ယ(ဒ်) ကစ်ပလင်း(Joseph Rudyard Kipling)၏ ကဗျာဖြစ်သော မန္တလေးကဗျာမှ စာသားများကို ရွှေတိဂုံဘုရားတွင်ရွတ်ဆိုခဲ့လေသည်။ ထိုစဉ် အတူရှိနေသော ဗြိတိသျှသံအမတ်ကြီးက မသင့်လျှော်ဟုအကြံပြုသော်လည်း ရွတ်ဆိုခဲ့လေသည်။ ထိုသို့ ကဗျာရွတ်သည့်အတွက် ၎င်းကို ဝေဖန်ခဲ့ကြသည်။[173][174][175]

ဘောရစ်ဂျွန်ဆင် မြန်မာနိုင်ငံ လူထုခေါင်းဆောင် ဒေါ်အောင်ဆန်းစုကြည်အား တွေ့ဆုံစဉ်၊ စက်တင်ဘာ ၂၀၁၆

ရုရှားအပေါ် ပိုမိုပြင်းထန်သော မူဝါဒကို ထောက်ပံ့အားပေးသည်။[176][177] ဗလာဒီမာပူတင်၏ ၂၀၁၈ကမ္ဘာ့ဖလားအိမ်ရှင်အဖြစ်လက်ခံကျင်းပခြင်းကို အဒေါ့ဖ် ဟသ်တလာ၏ ၁၉၃၆ နွေရာသီ အိုလံပစ်လက်ခံကျင်းပခြင်းနှင့်ခိုင်းနှိုင်းခဲ့၏။[178] နာဇီကိုတိုက်ခဲ့ရာ၌ လူသန်းပေါင်းများစွာ စတေးခဲ့ရသော ရုရှားနိုင်ငံအပေါ် ယခုလို လက်ခံနိုင်ဖွယ်မရှိ တန်ဖိုးမရှိသော နှိုင်းယှဉ်ချက်ဖြစ်သည်ဟု ရုရှားနိုင်ငံခြားရေးဝန်ကြီးက ဂျွန်ဆင်အားပြန်လည်ရှုံချခဲ့၏။[179]

ရုရှားမှ ဂျာမနီသို့ဆက်သွယ်သော Nord Stream 2 ဓာတ်ငွေ့ပိုက်လိုင်းသည် ဥရောပက ဆိုးဝါးသောရုရှားအပေါ်မီခိုရသည့် ခြိမ်းချောက်မှု ကွဲထွက်စေမှုဟုဖော်ပြခဲ့၏။[180] မြန်မာနိုင်ငံရခိုင်အရေးနှင့်ပတ်သက်၍ဝေဖန်ခဲ့သည်။[181] ၂၀၁၇ စက်တင်ဘာတွင် ဘရက်ဇစ်ပြီးဆီးပါက တစ်ပတ်တွင် အီးယူသို့ပေးရသော ပေါင် ၃၅၀ သန်းကို ယူကေက ပြန်လည်ရယူ၍ နိုင်ငံ့ကျန်းမာစောင့်ရှောက်ရေးလုပ်ငန်း (National Health Service - NHS)သို့ ထည့်ဝင်စေမည်ဟု ထပ်လောင်းပြောကြားခဲ့သေးသည်။[182] ၂၀၁၇ အထွေထွေရွေးကောက်ပွဲပြီးနောက် ဝန်ကြီးချုပ်မေ၏ ခေါင်းဆောင်မှုကို စိန်ခေါ်ရန်ရည်ရွယ်သည်ဟု သတင်းထုတ်ပြန်ချက်များကို ငြင်းဆိုခဲ့၏။[183]

အစ္စရေးဝန်ကြီးချုပ် ဘန်ဂျမင် နေတန်ယာဟုနှင့်အတူ၊ ၂၀၁၈ ဇွန်။

အမေရိကန်ပြည်ထောင်စု၏ ဂျေရုစလင်အား အစ္စရေးနိုင်ငံမြို့တော်အဖြစ် အသိအမှတ်ပြုခြင်းသည် ငြိမ်းချမ်းရေးအတွက် အခွင့်အလမ်းကာလတစ်ခုပါဟုလည်းပြောဆိုသွားခဲ့သေးသည်။[184] ဝန်ကြီူချုပ်၏ ဥရောပ သမဂ္ဂမှ ယူကေထွက်ရှိရေးကို ချဉ်းကပ်ကိုင်တွယ်မှု သဘောမကျသဖြင့် ဝန်ကြီးရာထူးစွန့်၍ အောက်လွှတ်တော် နောက်တန်းထိုင်ခုံသို့ ပြန်လည်ဝင်ရောက်ခဲ့လေသည်။

ဂျွန်ဆင်ကို ဝန်းရံပါဟူသော ၎င်း၏စည်းရုံးရေးအမှတ်တံဆိပ်

ထရီဇာ မေနှုတ်ထွက်အပြီး ၂၀၁၉ မေ ၁၆ ၌ လာမည့်ကွန်ဆာဗေးတစ်ခေါင်းဆောင်ရွေးချယ်ပွဲ၌ ယှဉ်ပြိုင်မည်ဟု အတည်ပြုခဲ့၏။[185] အမေရိကန်သမ္မတ ဒေါ်နယ်ထရမ့်က ယူကေသို့မသွားရောက်ခင် ဂျွန်ဆင်ကို ထိုရွေးချယ်ပွဲနှင့်ဆက်စပ်၍ အင်တာဗျူးတစ်ခု၌ " ဘောရစ်က ဝန်ကြီးချုပ်တစ်ဦးဖြစ်ဖို့ တကယ်သင့်လျော်တဲ့ ပါတယ်" ဟု ပြောကြားချီးမွန်းခဲ့လေသည်။ [186] ဇွန် ၇ တွင် မေ နှုတ်ထွက်အပြီး ၎င်းစည်းရုံးရေးကို စတင်သည်။ "သုံးနှစ်ကြာပြီ၊ နှုတ်ထွက်ရမဲ့ နေ့ရက်နှစ်ခုလဲ လွဲခဲ့ပြီးပြီ။ ဒီတစ်ခေါက်တော့ အောက်တိုဘာ ၃၁ မှာ အီးယူမှ ထွက်ကိုထွက်ရမယ်။ ပါလီမန်က သုံးခေါက် ပယ်ချထားသော လက်ရှိစေ့စပ်ထားတဲ့ စာချုပ်ထက် တို့တွေပိုကောင်းအောင်လုပ်နိုင်တယ်။ ရှင်းရှင်းလင်းလင်းပြောရရင် အလွတ်ထွက်တဲ့ရလဒ်ကို (no-deal outcome - အပေးအယူမရှိဘဲအီးယူမှ ထွက်ခြင်း)မရည်ရွယ်ပါဘူး။ ထွက်ရှိတဲ့အခါ အဲဒီ ပုံစံနဲ့အဆုံးသတ်မယ်လို့လည်း မယူဆပါဘူး။ အပေးအယူမရှိဘဲ ထွက်ရရင်လည်း ပြင်ဆင်ထားရပါမယ်။ အဲဒီ စွယ်စုံသုံးလို့ရတဲ့ စေ့စပ်ခြင်းဆိုတဲ့ ကရိယာကို ဘေးထုတ်ရှင်းလင်းဖို့ တစ်ဦးဦးက အကြံပြုမယ်ဆိုရင်တော့ အတော့်ကိုပဲ အံဩစရာဖြစ်မှာပါ။" - ဘောရစ် ဂျွန်ဆင် [187] ပါလီမန်အမတ်များ နောက်ဆုံးအကြိမ်မဲစာရင်းအရ ဂျွန်ဆင်သည်မဲအရေအတွက် (၁၆၀)ရပြီး ဂျရမီး ဟန့်နှင့်အတူ ဆန်ကာတင်နှစ်ဦးကို ရွေးချယ်ခဲ့ကြ၏။[188] အမတ်များ၏ မဲပေးရွေးချယ်မှုကို ဇူလိုင် ၂၂ တွင်ပိတ်ခဲ့ပြီး ဇူလိုင် ၂၃ တွင် ကြေငြာသော ရလဒ်အရ ဂျွန်ဆင် ၉၂,၁၅၃ မဲ (၆၆%) နှင့် ဟန့် ၄၆,၆၅၆ မဲ (၃၄%) အသီးသီးရှိ၍ ဂျွန်ဆင်ကို ပါတီခေါင်းဆောင်အဖြစ် ရွေးချယ်ကြသည်။[189]

ပြင်သစ် သမ္မတ အစ်မန်နျူယယ် မက်(ခ်)ရွန်နှင့် အတူ ဘရက်ဇစ်ကိစ္စဆွေးနွေး၊ ပါရီမြို့

၎င်း၏ပထမဆုံးဝန်ကြီးချုပ်အဖြစ်မိန့်ခွန်းတွင် ယူကေသည် အီးယူမှ ၂၀၁၉ အောက်တိုဘာ ၃၁ ၌ စေ့စပ်ညှိနှိုင်းမှုအချက်လက်များဖြင့်သော်လည်းကောင်း သို့မဟုတ် စေ့စပ်မှုမရှိသည့် အနေထားဖြင့်သော်လည်းကောင်း ထွက်ပါမည်ဟု ကတိပေးခဲ့၏။[192] ၂၀၁၉ ဩဂုတ် ၂၈တွင် ဂျွန်ဆင်သည် စေ့စပ်မှုမရှိသည့် အနေထားဖြင့်ထွက်ခြင်းကို တားဆီးမည်ဘောင် ကန့်သတ်ပိတ်ပင်ခြင်းအနေဖြင့် ဘုရင်မကြီးအား ပါလီမန်ကို စက်တင်ဘာ ၁၀ ရက်မှစ၍ ရွေ့ဆိုင်းရန် တောင်းဆိုခဲ့သည်။[193] ပါလီမန်ရွေ့ဆိုင်းခြင်းကို (စက်တင်ဘာ ၁၀ မှ အောက်တိုဘာ ၁၄ထိ) ပရစ်ဗီကောင်စီ၌ ဘုရင်မကြီးကအတည်ပြုပြီးသည်။[194] တချို့က ဤသို့ညွှန်းဆိုကြသည်။[195] ပါလီမန်ရွေ့ဆိုင်းခြင်းသည် အာဏာသိမ်းသည့်သဘောမျိုးနှင့် အလားသဏ္ဌာန်တူနေပြီး ယူကေအနှံ မြို့များတွင် ကန့်ကွက်ဆန္ဒပြမှုများ ပေါ်ပေါက်ခဲ့ကြ၏။[196][197] ၂၀၁၉ စက်တင်ဘာ ၂ ရက်စွဲအရ ဂျွန်ဆင်၏ လုပ်ဆောင်ချက်ကို သီးခြားရုံးတော် သုံးခုမှ စတင်စစ်ဆေးသည်။[198] စက်တင်ဘာ ၁၁ တွင် စကော့တလန် တရားသူကြီးများက ပါလီမန်ရွေ့ဆိုင်းခြင်းသည် တရားဥပဒေနှင့် မညီဟု ဆုံးဖြတ်ခဲ့ကြ၏။[199][200]ဘဲလ်ဖက်စ်ရုံးတော်မှ ၎င်း၏ ဘရက်ဇစ်အစီအစဉ်များသည် မြောက်အိုင်ယာလန်၏ ငြိမ်းချမ်းရေးမူများကို မကောင်းသောအကျိုးသက်ရောက်စေမည်ဆိုသော ပြောဆိုမှုများကို ငြင်းဆန်နေစဉ် ဂျွန်ဆင်မှာလည်း ပါလီမန်ရွေ့ဆိုင်းခြင်းအပေါ် ဘုရင်မအား လိမ်ညာသည်ဟူသော စွပ်စွဲချက်များကို ငြင်းဆိုခဲ့၏။ [201] ၂၄ စက်တင်ဘာ၌ နိုင်ငံ၏ အမြင့်ဆုံး ခုံရုံးတော်မှ ပါလီမန်ရွေ့ဆိုင်းခြင်းသည် တရားဥပဒေနှင့်မညီဟု တညီတညွတ်တည်းဆုံးဖြတ်၍ ပါလီမန်ရွေ့ဆိုင်းခြင်းမှာ ပျက်ပျယ်ကာအကျိုးသက်ရောက်မှုမရှိတော့ပေ။[202][203]

အတိုက်အခံအမတ်များ၊ ကွန်ဆာဗေးတစ်ပါတီမှ ပုန်ကန်သူများ(၎င်းကိုမထောက်ခံသူများ)က အလွတ်သဘောအီးယူမှထွက်ရှိခြင်း(No Deal Exit)ကို တားဆီးရန် အစိုးရအဖွဲ့၏ စီးပွားရေးဆိုင်ရာစနစ်အားထိန်းချုပ်စီမံမှုကိုဆန့်ကျင်၍ အောင်အောင်မြင်မြင် မဲပေးလိုက်သဖြင့် စက်တင်ဘာ ၃ ၌ ရွေးကောက်ပွဲသက်တမ်းဆိုင်ရာပါလီမန်အက်ဥပဒေဖြစ်သော Fixed-term Parliaments Act အရ အထွေထွေရွေးကောက်ပွဲခေါ်ဆိုမည်ဟု ဂျွန်ဆင်က ပြောဆိုခဲ့သည်။[204] အစိုးရ၏ဆန့်ကျင်မှုများရှိလင့်ကစား ၂၀၁၉ စက်တင်ဘာ ၄တွင် အီးယူမှအလွတ်မထွက်ရဥပဒေတစ်ရပ်ကို အောက်လွှတ်တော်တွင် အတည်ပြုခဲ့ကြသည်။ ထိုပြထမ်းမှုများက ဂျွန်ဆင်ကို အောက်တိုဘာ ၁၅ အထွေထွေရွေးကောက်ပွဲခေါ်ဆိုစေခြင်းဖြစ်စေခဲ့လေသည်။[205] ၎င်း၏အရွေ့မှာ လွှတ်တော်သုံးပုံနှစ်ပုံ၏ထောင်ခံမှုမရခဲ့၍ မအောင်မြင်ခဲ့ပါ။[206]

ပထမဆုံးအကြိမ် အစိုးရအစည်းဝေးပွဲ၊ အမှတ်(၁၀)၊ ဒေါင်းနင်းလမ်း 25 July 2019

၎င်း၏ပထမဆုံးအစိုးရအဖွဲ့ကို ဗြိတိန်၏ ခေတ်သစ်အစိုးရအဖွဲ့ဟု ခေါ်ဝေါ်ရင်း ဇူလိုင် ၂၄ ၌ဖွဲ့စည်းသည်။[207]

အခြားသောခန့်အပ်မှုများတွင်ဂျွန်ဆင်သည် ဒေါမစ်နစ် ရာ့ဘ် (Dominic Raab)အား ပထမအတွင်းဝန်ရာထူး နှင့် နိုင်ငံခြားရေးဝန်ကြီး(First Secretary of State and Secretary of State for Foreign and Commonwealth Affairs)အဖြစ်ခန့်အပ်ခဲ့ပြီး စဂျစ် ဂျားဗစ် (Sajid Javid) နှင့် ပရစ်တီ ပဲတယ်လ် (Priti Patel) တို့ကို ဘဏ္ဍာရေးရာအဓိပတိ (Chancellor of the Exchequer) နှင့် ပြည်ထဲရေးဝန်ကြီး(Home Secretary)အဖြစ်အသီးသီးခန့်အပ်ခဲ့သည်။ ဂျွန်ဆင်က အစိုးရဝန်ကြီးအဖွဲ့ကို ဝန်ကြီးချုပ်မေ လက်ထက်က အရေအတွက်ထက် ၄ဦးပိုမိုခန့်အပ်သဖြင့် ဝန်ကြီး ၃၃အထိရှိလာခဲ့သည်။ ခန့်အပ်ခံရသူများထဲမှလေးပုံတစ်ပုံမှာအမျိုးသမီးများဖြစ်ပြီး အစိုးရအဖွဲ့အတွင်းဝင် (၄) ဦး နှင့်နောက်ထပ်ဝန်ကြီးနှစ်ဦး သည်လူနည်းစုနောက်ခံမှဖြစ်ကြပြီး၊ လူနည်းစုလူမျိုးများကိုယ်စားပြုမှုအတွက် အစိုးရအဖွဲ့သည်စံချိန်သစ်တင်ခဲ့သည်။ ခန့်အပ်ခံများ၏ သုံးပုံနှစ်ပုံနီးပါးသည်အခကြေးငွေပေးဆောင်ရသောကျောင်းများသို့သွားခဲ့ပြီးထက်ဝက်နီးပါးသည်အောက်စ်ဘရစ်တက္ကသိုလ်များသို့တက်ရောက်ခဲ့ကြသည်။ ဂျွန်ဆင်သည် ပါတီခေါင်းဆောင်ရွေးပွဲကတိကဝတ်ကိုဖြည့်ဆည်းသည့်အနေဖြင့် သူကိုယ်တိုင်တာဝန်ယူမည့် ယူနိုက်တက်ကင်းဒမ်းနိုင်ငံရေးရာဝန်ကြီး(Minister for the Union)ဆိုသော ရာထူးအသစ်တစ်ခုကိုလည်း ဖန်တီးခဲ့သည်။[207][208]

ပြင်သစ်အနောက်တောင်ပိုင်း ဘီယာရစ်မြို့(ပြင်သစ်အသံ-ဗြာရစ်မြို့)၌ ၄၅ကြိမ်မြောက် G7 ထိပ်သီးအစည်းအဝေးပွဲ၊ အမေရိကန်ပြည်ထောင်စု သမ္မတ ဒေါ်နယ် ထရမ့် နှင့်အတူ၊ ၂၆ ဩဂုတ် ၂၀၁၉။

ဟောင်ကောင်၏ ဖီးနစ်တီဗီအင်တာဗျူးတစ်ခု၌ ၎င်းအစိုးရသည် တရုတ်ပြည်ကြီးနှင့် သမ္မတရှီကျင်းပင်၏ ကြိုးပမ်းမှုဖြစ်သော ပိုးလမ်းမပတ်လမ်းအစီအစဉ်ကို ထောက်ခံ၍ ယူကေသည် တရုတ်ရင်းနှီးမြှပ်နှံမှုတွင် ဥရောပ၌အပွင့်လင်းဆုံးစီးပွားရေးတစ်ခုဖြစ်စေရမည်ဟု ကတိပေးခဲ့သည်။[209]အီးယူ၏ မာကိုစာလွတ်လပ်သောကုန်သွယ်ရေးသဘောတူညီမှုကိုလည်း ထောက်ခံသည်။[210] ထိုသဘောတူညီချက်မှာ ကမ္ဘာ၏အကြီးဆုံးလွတ်လပ်သော ကုန်သွယ်ရေးနယ်မြေဖြစ်စေမည်ဖြစ်သည်။ [211] စက်တင်ဘာ ၃ တွင် ဖီးလစ်လီသည် ၎င်း၏ ဘရက်ဇစ်မူများကို သဘောမကျ၍ လစ်ဘရယ်ဒီမိုကရက်ပါတီသို့ ကူးပြောင်းသဖြင့် အစိုးရအဖွဲ့အား အောက်လွှတ်တော်တွင် အများစုအရေအတွက်(working majority) ဆုံးရှုံးခဲ့ရလေသည်။[212] ထိုနေ့နှောင်းပိုင်းတွင်ပင် ကွန်ဆာဗေးတစ်ပုန်ကန်သူများ ယခင်ပါတီ၏ အဓိပတိများဖြစ်သောKenneth Clarke၊ Philip Hammond၊ Nicholas Soames(ဝင်စတန် ချာချီ၏ မြေး)အပါအဝင် ၂၁ ဦးသောအမတ်များကို ပါတီ၏အမိန့်နှင့် ဆန့်ကျင်မှုရှိသဖြင့် ပါတီမှ ထုတ်နှုတ်ဖယ်ရှားခဲ့လေသည်။[213] နောက်ပိုင်းတွင် ၂၉ အောက်တိုဘာ၌ ထိုထုတ်ပစ်ခဲ့သော ယခင်ပါတီဝင် ၁၀ ဦးကိုပြန်လည်လက်ခံခဲ့၏။[214]အထက်ပါ ထုတ်နှုတ်ရှင်းသည်ကို သဘောမကျသောအားဖြင့် တစ်ခြားသောနှုတ်ထွက်မှုများလည်းရှိခဲ့ကြသည်။

၂၀၁၉ အောက်တိုဘာတွင် တစ်နှစ်တာအတွက် ပါလီမန်ကို ဖျက်သိမ်းကာ ဒီဇင်ဘာ ၁၂ တွင် ရွေးကောက်ပွဲခေါ်ခဲ့သည်။ ထိုရွေးကောက်ပွဲကြီးကား ၁၉၈၇အထွေထွေရွေးကောက်ပွဲကတည်းက ကွန်ဆာဗေးတစ်ပါတီကို အကြီးအကျယ်ဆုံးအောင်မြင်မှုပေးနိုင်ခဲ့လေသည်။[215]