ဧရာဝတီတံတား (ညောင်တုန်း)

ဧရာဝတီတံတား (ညောင်တုန်း) သည် ဧရာဝတီတိုင်းဒေသကြီး မအူပင်ခရိုင် ညောင်တုန်းမြို့နယ်အတွင်း တည်ရှိသည့် ဧရာဝတီမြစ်ကူးတံတား ဖြစ်သည်။ ပြည်ထောင်စုသမ္မတ မြန်မာနိုင်ငံတော် အစိုးရ လက်ထက်တွင် ရှစ်စင်းမြောက် ဖွင့်လှစ်သည့် ပေ ၁၈ဝ နှင့်အထက် တံတား ဖြစ်သည်။ နှစ်လမ်းမောင်း ကားလမ်းနှင့် ရထားလမ်းယှဉ်တွဲပါရှိသည့် သံမဏိသံပေါင် တံတားကြီး ဖြစ်ပြီး ဗိုလ်မြတ်ထွန်းတံတား၏ အထက်ဘက် ပေ ၈ဝဝဝ အကွာတွင် တည်ဆောက် ထားခြင်း ဖြစ်သည်။ ဧရာဝတီတံတား(ညောင်တုန်း) တည်ဆောက်ရေးစီမံကိန်းကို ၂ဝ၁ဝ ခုနှစ် ဇန်နဝါရီ ၁ ရက်တွင် စတင်အကောင်အထည်ဖော်ခဲ့ပြီး တစ်နှစ် ၁ဝ လ ၂၅ ရက်ဖြင့် အချိန်တိုအတွင်း တည်ဆောက်နိုင်ခဲ့သည့် တံတားကြီးဖြစ်သည်။[1]

ဧရာဝတီတံတား (ညောင်တုန်း)
သယ်ဆောင်မှုနှစ်လမ်းသွားကားလမ်း၊ ရထားလမ်း၊ လူသွားလမ်း
ဖြတ်သန်းမှုဧရာဝတီမြစ်
တည်နေရာညောင်တုန်းမြို့နယ်၊ မအူပင်ခရိုင်၊ ဧရာဝတီတိုင်းဒေသကြီး
အမည်ဧရာဝတီတံတား (ညောင်တုန်း)
အချက်အလက်များ
တံတားဒီဇိုင်းသံမဏိသံပေါင်တံတား
စုစုပေါင်းအရှည်ပင်မတံတားနှင့် ကားလမ်းတံတား စုစုပေါင်းအရှည် ၁ဝ၈၁၄ ပေ၊ ပင်မတံတားနှင့် ရထားလမ်းတံတား စုစုပေါင်းအရှည် ၂ဝ၅၄၅ ပေ၊ ချဉ်းကပ်ကားလမ်း စုစုပေါင်းအရှည် ၁၁၃၈၉ပေ
အကျယ်နှစ်လမ်းသွားကားလမ်း အကျယ် ၂၈ ပေ၊ ရထားလမ်း အကျယ် ၁၄ ပေ၊ လူသွားလမ်းအကျယ် တစ်ဖက်လျှင် သုံးပေသုံးလက်မစီ
ခံနိုင်ဝန်အားယာဉ်တစ်စီးချင်း ခွင့်ပြုအလေးချိန် ၇၅ တန်
သမိုင်းကြောင်း
ဆောက်လုပ်သူပြည်သူ့ဆောက်လုပ်ရေးလုပ်ငန်း
စတင်ဆောက်လုပ်ချိန်၁ ဇန်နဝါရီ ၂ဝ၁ဝ
ဖွင့်လှစ်သည့်နေ့၂၇ နိုဝင်ဘာ ၂၀၁၁

တံတားအချက်အလက်များ

ပင်မတံတားအုတ်မြစ်မှာ ဘိုးပိုင်သံကူကွန်ကရစ် အမျိုးအစား၊ တံတားတိုင်များမှာ သံကူကွန်ကရစ် အမျိုးအစားနှင့် တံတားအပေါ်ထည်မှာ သံမဏိသံပေါင် အမျိုးအစား ဖြစ်သည်။ ပင်မတံတားမှာ ၇၄ဝ၂ ပေ ရှည်သည်။ ချဉ်းကပ်တံတား(ကားလမ်း)အနေဖြင့် ပုသိမ်ဘက်ကမ်း ၁၈၃၇ ပေ၊ ရန်ကုန်ဘက်ကမ်း ၁၅၇၅ ပေ စုစုပေါင်း ၃၄၁၂ ပေ ရှည်သည်။ ချဉ်းကပ်တံတား (ရထားလမ်း)အနေဖြင့် ပုသိမ်ဘက်ကမ်း ၆၅၂၉ ပေ၊ ရန်ကုန်ဘက်ကမ်း ၆၆၁၄ ပေ စုစုပေါင်း ၁၃၁၄၃ ပေ ရှည်သည်။ တံတားတစ်စင်းလုံးအနေဖြင့် ပင်မတံတားနှင့် ချဉ်းကပ်ကားလမ်း တံတားအရှည် ၁ဝ၈၁၄ ပေ၊ ပင်မတံတားနှင့် ချဉ်းကပ်ရထားလမ်း တံတားအရှည် ၂ဝ၅၄၅ ပေ ရှည်သည်။ ကားလမ်း အကျယ် ၂၈ ပေနှင့် ရထားလမ်း အကျယ် ၁၄ ပေရှိပြီး လူသွားလမ်း တစ်ဖက်လျှင် သုံးပေစီ ပါရှိသည်။ ရေလမ်းကင်းလွတ်အကျယ် ၂၆၂ ပေ၊ ရေလမ်း ကင်းလွတ်အမြင့် ၅၇ ပေရှိသည်။ ယာဉ်တစ်စီးချင်းခွင့်ပြုအလေးချိန်မှာ ၇၅ တန် ဖြစ်သည်။[1]

ကိုးကား
  1. နိုင်ငံတော်သမ္မတဦးသိန်းစိန် ဧရာဝတီတံတား (ညောင်တုန်း) ဖွင့်ပွဲ အခမ်းအနား တက်ရောက် အားပေးချီးမြှင့်။ ပြည်ထောင်စုသမ္မတ မြန်မာနိုင်ငံ၊ နိုင်ငံတော် သမ္မတရုံး (27 November 2014)။
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.