ဗိုလ်ချုပ်အောင်ဆန်း အားကစားကွင်း

ဗိုလ်ချုပ်အောင်ဆန်း အားကစားကွင်းသည် ဘက်စုံအားကစားကွင်းတစ်ခုဖြစ်ပြီး ရန်ကုန်မြို့ မြို့လယ်ဧရိယာတွင် တည်ရှိသည်။၁၉၀၈ခုနှစ်တွင် စတင်တည်​ဆောက်ခဲ့ပြီး ၁၉၁၀ခုနှစ်တွင် ပြီးစီးခဲ့သည်။၁၉၃၅ခုနှစ်တွင် မီတာ၄၀၀​ပြေးလမ်းကို ​ဖောက်လုပ်ခဲ့သည်။[2]

ဗိုလ်ချုပ်အောင်ဆန်း အားကစားကွင်း
တည်နေရာမင်္ဂလာ‌တောင်ညွန့်မြို့နယ်၊ ရန်ကုန်မြို့၊ မြန်မာနိုင်ငံ
ဝင်ဆံ့ပမာဏ၄၀,၀၀၀[1]
မျက်နှာပြင်မြက်ခင်းပြင်

လွတ်လပ်ရေးခေါင်းဆောင် ဗိုလ်ချုပ်အောင်ဆန်းကို ဂုဏ်ပြု၍ အမည်ပေးထားခြင်းဖြစ်ပြီး ပရိသတ်ဦးရေ ၄၀,၀၀၀[1] ဆန့်ကာ မြန်မာနိုင်ငံတွင် အကြီးဆုံး အားကစားကွင်းကြီးလည်း ဖြစ်သည်။ အဆိုပါ အားကစားကွင်း ၁၉၆၁ ခုနှစ်နှင့် ၁၉၆၉ ခုနှစ်တွင် အရှေ့တောင်အာရှ ကျွန်းဆွယ် အားကစားပြိုင်ပွဲကို အိမ်ရှင်အဖြစ် လက်ခံကျင်းပခဲ့သည်။ ယခုအခါတွင် မြန်မာ နေရှင်နယ် လိဂ်ဘောလုံးပွဲများကို အများဆုံးကျင်းပရာ အားကစားကွင်း ဖြစ်နေသည်။

သမိုင်းကြောင်း

ယခု အောင်ဆန်းကွင်းနေရာတွင် ဘီအေအေ (The Burma Athletics Association- BAA) ၏အားကစားပြိုင်ကွင်းကို ၁၉၀၈ ခုနှစ်လောက်တွင် စတင်ဆောက်လုပ်ခဲ့ပြီး ၁၉၁၀ ပြည့်နှစ်တွင် တည်ဆောက်ပြီးစီးခဲ့သည်။ ထိုကွင်းတွင် ဘောလုံးအပါအဝင် အားကစားပြိုင်ပွဲများကို စတင်ကျင်းပခဲ့သည်။ ဘီအေအေကွင်းတွင် ဘောလုံးပွဲယှဉ်ပြိုင်နိုင်သော ကွင်းနှစ်ကွင်းပါရှိရာ ပွဲကြည့်စင်နှင့် နီးသောကွင်းကို အနီးကွင်းဟု ခေါ်ခဲ့ကြပြီး ယခုအရှေ့ဘက် ပွဲကြည့်စင်နေရာတွင် အဝေးကွင်းရှိသည်။ အနီးကွင်းမှာ ကိုက် ၄၄၀ (မီတာ ၄၀၀) ပြေးလမ်းပတ်ထားသော ဘောလုံးကွင်းဖြစ်ပြီး ၁၉၃၅ ခုနှစ်တွင် ဖောက်လုပ်ပေးခဲ့သည်။ ပြေးခုန်ပစ် ပြိုင်ပွဲများယှဉ်ပြိုင်နိုင်အောင် အကွက်ချ တည်ဆောက်ထားပြီး အနောက်ဘက်ပွဲကြည့်စင်နှင့် တောင်ဘက်ပွဲကြည့်စင်တို့သာ ရှိခဲ့သည်။ လွတ်လပ်ရေးရရှိပြီးနောက်ပိုင်း ဘီအေအေကွင်းကို အောင်ဆန်းအားကစားပြိုင်ကွင်းဟု ပြောင်းလဲမှည့်ခေါ်ခဲ့သည်။ ၁၉၆၁ခုနှစ်တွင် မြန်မာနိုင်ငံက ဒုတိယအကြိမ် အရှေ့တောင်အာရှ ကျွန်းဆွယ် အားကစားပြိုင်ပွဲကို အိမ်ရှင်အဖြစ် လက်ခံကျင်းပရန်တာဝန်ယူခဲ့သည်။ အောင်ဆန်းကွင်းကို အဓိကကွင်းဟုသတ်မှတ်ပြီး ဖွင့်ပွဲ၊ ပိတ်ပွဲများကျင်းပနိုင်ရန် ပိုမိုခေတ်မှီစေရန် အရှေ့ဘက်ပွဲကြည့်စင်ကို တည်ဆောက်လိုက်ရ၍ အဝေးကွင်းကို စွန့်လွှတ်ခဲ့ရသည်။ အောင်ဆန်းကွင်းကို လေးဖက်မြင် ပွဲကြည့်စင်အဖြစ် မွမ်းမံတည်ဆောက်ခဲ့သည်။[3]

ကိုးကား
  1. Stadiums in Myanmar။ World Stadiums။ ၂၀၀၈-၁၁-၂၄ တွင် ပြန်စစ်ပြီး။
  2. မြန်မာ့ ပြေးခုန်ပစ် ဆီးဂိမ်းမှာ ဟန်ပါ့မလား။ ဧရာဝတီ သတင်း။
  3. မြန်မာ့ ဘောလုံး သမိုင်းကြောင်း (ပထမပိုင်း)


    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.