ဗထူး အားကစားကွင်း
ဗထူးအားကစားကွင်း (အင်္ဂလိပ်: Bahtoo Stadium) သည် ဘက်စုံသုံး အားကစားပြိုင်ကွင်း တစ်ခု ဖြစ်ပြီး မန္တလေးမြို့၊ ချမ်းအေးသာဇံမြို့နယ်တွင် တည်ရှိသည်။ ယခင်က ယူဘီအေအေ(UBAA) အထက်ဗမာနိုင်ငံ အားကစားကွင်းဟု ခေါ်ပြီး နောင်တွင် ဖက်ဆစ် ဂျပန်တော်လှန်ရေး ခေါင်းဆောင်တစ်ဦးဖြစ်သူ ဗိုလ်မှူးကြီးဗထူး နာမည်ကို ဂုဏ်ပြုမှည့်ခေါ်ထား၍ ဗထူး အားကစားကွင်းဟု အမည်တွင်လာသည်။
![]() | |
ယခင်အမည် | အထက်ဗမာနိုင်ငံ အားကစားကွင်း |
---|---|
လိပ်စာ | လမ်း ၃၀၊ ၇၁လမ်းထောင့်၊ ချမ်းအေးသာစံမြို့နယ် |
တည်နေရာ | မန္တလေးမြို့၊ မြန်မာနိုင်ငံ |
ကိုဩဒိနိတ် | 21°59′00″N 96°6′00″E |
ပိုင်ဆိုင်သူ | ကျန်းမာရေးနှင့် အားကစား ဝန်ကြီးဌာန |
စီမံခန့်ခွဲသူ | အားကစားနှင့်ကာယပညာဦးစီးဌာန |
ဝင်ဆံ့ပမာဏ | ၁၇,၀၀၀[1] |
မျက်နှာပြင် | မြက်ခင်းပြင် |
တည်ဆောက်ခြင်း | |
ဖွင့်လှစ် | ၁၈၉၀ |
တိုးချဲ့ | ၁၉၆၆ |
ငှားရမ်းသူ | |
ရတနာပုံ ဘောလုံးအသင်း |
ပရိတ်သတ် ၁၇၀၀၀ ကျော် ဝင်ဆန့်ပြီး အထက်မြန်မာနိုင်ငံ၏ အဓိက အားကစားပြိုင်ကွင်း တစ်ခု ဖြစ်ခဲ့သည်။ မြို့ခံများက ဗထူးကွင်းဟု ခေါ်ဆိုကြသည်။ ဗထူးကွင်းသည် မြန်မာအမျိုးသားလိဂ် ပြိုင်ပွဲဝင် ရတနာပုံ ဘောလုံး အသင်း၏ အိမ်ကွင်းလည်း ဖြစ်သည်။
ဗထူးကွင်းတွင် ပြည်တွင်း ဘောလုံးပြိုင်ပွဲများ အဓိကထား ကျင်းပလေ့ရှိပြီး ပြည်ပ ဘောလုံးပြိုင်ပွဲအနေဖြင့် ၂၀၀၆ ခုနှစ်က ဂရန်းရွိုင်ရယ် ဖိတ်ခေါ်ဘောလုံးပြိုင်ပွဲ (မြန်မာ) ကို လက်ခံကျင်းပခဲ့သည်။[2]
သမိုင်းကြောင်း
မန္တလေးမြို့ကို အင်္ဂလိပ်တို့ သိမ်းပိုက်အပြီး ၁၈၈၅ခုနှစ် ဒီဇင်ဘာလ ၁၅ရက်နေ့တွင် ကော်မရှင်နာမင်းကြီးက မြို့ပြအုပ်ချုပ်ရေးအောက်သို့ လွှဲပြောင်းယူကာ လက်ထောက်ကော်မရှင်နာအောက်တွင် ထားသည်။၁၈၈၇ခုနှစ်တွင် မြူနီစီပယ်ကိုဖွဲ့ကာ မြို့ပြကိစ္စများကို တစ်ဆင့်ပြီးတစ်ဆင့် ဆောင်ရွက်ခဲ့သည်။၁၈၉၀ ဝန်းကျင်ခန့်က နန်းမြို့ရိုးတောင်ဘက် ကျွန်းလုံးယူတံခါးနှင့် ကျော်မိုးတံခါးကြား ပြအိုးမှ သုံးပြအကွာ ပတ်ကုန်းဝန်းကျင်ရပ်ကွက်အတွင်းရှိ တစွပြပတ်လည် မြေကွက်လပ်ကြီးကို သွပ်များ ကာရံလိုက်သည်။ထိုအထဲတွင် အင်္ဂလိပ်စစ်သားများ ဘောလုံးကန်ကြသည်။ထိုအချိန်မှသာ မြို့ခံလူထုမှာ ဘောလုံးကစားခြင်းကို မြင်ဖူးကြသည်။မန္တလေးတောင်ခြေတွင် တပ်စွဲထားသော ဂေါ်ရာတပ်မှ တပ်သားများက တပ်တွင်း ကန်ရုံမျှမက မေမြို့တွင် တပ်စွဲထားသော စစ်သားများနှင့် အချိန်းအချက်ပြု၍ ကန်ကြသည်။သို့သော် ဒေသခံမြန်မာများမှာ စိတ်မဝင်စားဘဲ ခြင်းခတ်ခြင်း၊ လက်ဝှေ့ထိုးခြင်း၊ အပြေးပြိုင်ခြင်း စသည့်ရိုးရာအားကစားနည်းများသာ စိတ်ဝင်စားကြသည်။
မန္တလေးအရေးပိုင် မျက်နှာဖြူများက ရန်ကုန်တွင် မြန်မာများလည်း ဘောလုံးကစားနေခဲ့ပြီးဖြစ်ရာ မန္တလေးတွင်လည်း မြန်မာများက ၎င်းတို့ကို ဆန့်ကျင်လိုစိတ်များ မဖြစ်လာစေရန် ဘောလုံးကစားနည်းကို စိတ်ဝင်စားရန် လိုအပ်လာသည်။ထို့ကြောင့် ရန်ကုန်စိန့်ဂျွန်းကောလိပ်မှ ဘောလုံးကန်တော်သော မြန်မာများကို မန္တလေးအရေးပိုင်မှ ခေါ်ယူလိုက်သည်။ထိုကျောင်းသားအချို့မှာ စာမတော်သော်လည်း အားလုံးကို အရေးပိုင်ရုံးတွင် စာရေးခန့်ထားလိုက်သည်။
မြန်မာများက ကိုယ်တိုင်ဘောလုံးကန်သဖြင့် မြို့ခံလူထုမှာ စိတ်ဝင်စားလာရာ အရေးပိုင်ရုံးက မြန်မာအသင်းကို အရပ်သားအသင်းဟုအမည်ပေးလိုက်ကြသည်။ရုံးသင်းဟုလည်း ခေါ်ကြသည်။
ထိုအသင်းများ ဘောလုံးကန်ရာ ပတ်ကုန်းဝန်းကျင်ရှိ မြေကွက်လပ်ကြီးကို အထက်ဗမာနိုင်ငံအားကစားကွင်း (Upper Burma Athletics Association- UBAAကွင်း)ဟု ခေါ်ခဲ့ကြသည်။
၁၉၅၅ခုနှစ် အိမ်စောင့်အစိုးရလက်ထက်တွင် UBAAကွင်းမှ ဗထူးကွင်းအဖြစ် ဥတ္တရတိုင်းမှူး ဦးချစ်အုန်း၏ ညွှန်ကြားမှုဖြင့် ပြောင်းခဲ့သည်။[3]UBAAခေတ်က အနောက်ဘက်ရှိ မင်ဘားတန်းဟုခေါ်သော နေရာ၌သာ သစ်သားပွဲကြည့်စင်ရှိခဲ့ရာမှ အမိုးနှင့် အုတ်ခုံပွဲကြည့်စင်များ တစ်ခုပြီးတစ်ခုတိုးလာသည်။အရှေ့ဘက်၊ တောင်ဘက်နှင့် မြောက်ဘက်တွင်လည်း သစ်သားပွဲကြည့်စင်များ ဆောက်လုပ်ခဲ့သည်။

ဗထူးကွင်းကို ၁၉၆၆ခုနှစ်ဝန်းကျင် ကျောင်းသားပွဲတော်များကျင်းပစဉ်က ပွဲကြည့်စင်များပြင်ဆင်ခဲ့သည်။၁၉၇၂ခုနှစ် တိုင်းနှင့် ပြည်နယ်ဘောလုံးပြိုင်ပွဲများ ကျင်းပရာတွင် ပွဲကြည့်စင်များ တိုးချဲ့ခဲ့၏။ထို့နောက် အထွေထွေမြို့ပြစီမံကိန်းများကြောင့် မန္တလေးမြို့၏ ဒုတိယတန်းစားဘောလုံးကွင်းများ ပျောက်ကွယ်သွားရသည်။၂၀၀၇ခုနှစ်တွင် မီးမောင်းကြီးများ တပ်ဆင်ခဲ့သည်။၂၀၀၉ခုနှစ် မြန်မာနေရှင်နယ်လိဂ်စတင်ချိန်တွင် မန္တလေးတိုင်းကိုယ်စားပြု ရတနာပုံဘောလုံးအသင်း၏ အိမ်ကွင်းအဖြစ် အသုံးပြုခဲ့သည်။၂၀၁၃တွင် မန္တလာသီရိကွင်းအသစ်ပေါ်ပေါက်လာခဲ့သော်လည်း မန္တလေးမြို့၏ အရေးပါလှသော အားကစားကွင်းအဖြစ် ဆက်လက်တည်ရှိနေဆဲဖြစ်သည်။[4]
ပြင်ဆင်ခြင်း
၂၀၁၉ခုနှစ်တွင် နှစ်ပေါင်း၁၂၀ဝန်းကျင် သက်တမ်းရှိပြီဖြစ်သော ဗထူးအားကစားကွင်းကို မေလမှစတင်ကာ ငွေကျပ် သိန်း၁၈၀၀အကုန်အကျခံ၍ အကြီးစားပြုပြင်ခဲ့သည်။[5]
ကိုးကား
- Stadiums in Myanmar။ World Stadiums။ 2008-11-24 တွင် ပြန်စစ်ပြီး။
- "Myanmar triumphs in three-nation soccer tournament"၊ Xinhua News၊ 2006-12-24။ 2008-11-24 တွင် ပြန်စစ်ပြီး။
- "ဗိုလ်မှူးဗထူး ကွယ်လွန်ခြင်း ၇၄ နှစ်ပြည့်"၊ ဧရာဝတီ။
- ဆူးငှက်။ မန္တလေးမျဉ်းဖြောင့်များ။ zero width space character in
|title=
at position 13 (အကူအညီ) - "ဒုတိယအကျော့ အတွက် အိမ်ကွင်း ပြောင်းဖို့ ရှိနေတဲ့ ရတနာပုံ အသင်း"။