မက္ခရာမြို့ဟောင်း

မက္ခရာမြို့ဟောင်း သည် မြန်မာနိုင်ငံမန္တလေးတိုင်းဒေသကြီးကျောက်ဆည်ခရိုင်တွင် တည်ရှိသည်။ မက္ခရာ သည် သိသူ၊ ရောက်ဖူးသူ နည်းသော၊ ဘုရင်ထီးနန်းစိုက်ခဲ့သော သမိုင်းဝင် မြို့တစ်မြို့ ဖြစ်သည်။ အနော်ရထာ မင်းကြီးလက်ထက် သက္ကရာဇ် ၃၉၅ ခုနှစ် တပေါင်းလဆန်း ၁၂ ရက် သောကြာနေ့၌ တည်သော“ကင်း ၄၃ မြို့”တွင် တစ်မြို့ အပါအဝင်ဖြစ်၏။

မက္ခရာ
မက္ခရာ
မြန်မာနိုင်ငံတွင်း တည်နေရာ
ကိုဩဒိနိတ်: 21°0′0″N 96°4′0″E
နိုင်ငံ မြန်မာ
တိုင်းဒေသကြီးမန္တလေးတိုင်းဒေသကြီး
ခရိုင်ကျောက်ဆည်ခရိုင်
မြို့နယ်စဉ့်ကိုင်မြို့နယ်
တည်ထောင်၁၃ ရာစု
အချိန်ဇုန်မြန်မာစံတော်ချိန် (UTC6:30)

ရှမ်းညီနောင် ၃ ဦးအနက် အလတ် ရာဇသင်္ကြန်သည် မက္ခရာကို နန်းစိုက်၍ သက္ကရာဇ် ၆၆၆ တွင် မင်းပြု၏။ နန်းသက်၅နှစ်ကြာခဲ့သည်။

မက္ခရာမြို့သည် မန္တလေးတိုင်း၊ ကျောက်ဆည်ခရိုင်၊ စဉ့်ကိုင်မြို့နယ်၊ ဧည့်ပြ (အဲ့ဗျ) ကျေးရွာအုပ်စု၊ ဇော်ဂျီမြစ်ခေါ် မက္ခရာမြစ်နှင့် ဒုဋ္ဌဝတီမြစ်ခေါ်မြစ်ငယ်မြစ်တို့ဆုံရာ မြစ်နှစ်ခု၏ အရှေ့ဖက်ကမ်းတွင် တည်ရှိခဲ့သည်။ ယခင်က လမ်းခရီးခက်ခဲသောကြောင့် ဧည့်သည်၊ လေ့လာသူများ အရောက်အပေါက်နည်းကာ အခြား သမိုင်းဝင်မြို့များကဲ့သို့ ထင်ပေါ်မှု မရှိခဲ့ချေ။ ယနေ့အချိန်တွင်မူ မန္တလေးမှလာလျှင်၊ မန္တလေး ရန်ကုန်ကားလမ်းအတိုင်း စဉ့်ကိုင်မြို့ မရာက်မီ ညောင်ပင်ကြီးလမ်းခွဲမှ တအုံ ကွန်ပျူတာတက္ကသိုလ်ဆီသွားသောလမ်းအတိုင်း ဝင်လာလျှင်၊ ၁၅မိနစ်ခန့်မောင်းရမည့် ခရီးနှင့် ရောက်နိုင်ပြီ ဖြစ်၏။ လမ်းခရီး တစ်လျှောက်တွင် လယ်ကွင်းများ၊ ယာခင်းများ၊ ဥယျာဉ်ခြံမြေများ၊ အထက်အညာဒေသလှပသောကျေးရွာ ပတ်ဝန်းကျင်တို့နှင့် စိမ်းစိမ်းစိုစို သာယာလှပါ၏။ တစ်ချိန်က ထီးဖြူဆောင်း ထီးနန်းစိုက်ခဲ့သော မြို့မက္ခရာကား ကာလအတော်ကြာ ကွယ်ပျောက်နေခဲ့သည်။ မြို့ဟောင်းမှာ မြို့ရိုးပျက် အနည်းငယ်၊ တိမ်ကောနေသောကျုံး၊ တစ်ချိန်က ရွှေရောင်တွေ လွှမ်းနေခဲ့မယ့် စေတီတော်များ၊ ဂူဘုရားတွေက နှစ်ပေါင်းများစွာ ချုံနွယ်ပိတ်ပေါင်းတွေအောက်မှာ ညှိုးငယ်စွာရှိခဲ့ရာမှ ကျောက်ဆည်မြို့ မဟာဂန္ဓာရုံဆရာတော် အရှင်ကုသလာဘိဝံသ ဦးဆောင်ကာ ပြန်လည်ပြုပြင်မှုများကြောင့် အခုတော့ သမိုင်းဝင်နေရာလေးတစ်ခု အဖြစ် ဝင့်ကြွားလာရပါပြီ။

မြို့ပမာဏမှာ တာပေါင်း ၄၇၀၊ နန်းမြို့ရိုးမှာ အရှေ့အနောက် ၁၂၀၀ပေ၊ တောင်မြောက် ၁၄၅၀ပေ၊ နန်းတော်ဝင်းမှာ တောင်မြောက် ၆၀၀ပေ၊ အရှေ့အနောက် ၄၅၀ပေ ရှိသည်။ မက္ခရာမြို့ဟောင်းတစ်ဝိုက်တွင် စေတီတော်များ၊ ဂူဘုရားများ ဘုရားပြို၊ဘုရားပျက်၊ ဘုရားကောင်းများ အဆူ ၇၀ ကျော် တွေ့ရှိရသည်။ သမိုင်း လေ့လာချက်တစ်ခုတွင် ၁၂၆ ဆူရှိသည်ဟု ဆိုသည်။ ဥစ္စနာ (ပင်းယဥဇနာ) မင်းကြီး၊ မင်းကြီးရန်နောင်တို့ တောထွက်ခဲ့ရာဒေသဖြစ်သည်။

မက္ခရာမြို့ဟောင်း မြောက်ဘက်တွင် အိမ်ခြေ ၈၀ ခန့်ရှိ မက္ခရာရွာငယ်လေးရှိသည်။ ထိုရွာ၏အနောက်ဘက် မလှမ်းမကမ်းတွင် စည်ကားသော အဲ့ဗျရွာကြီးရှိ၏။ မက္ခရာမြို့ဟောင်းတွင် လေ့လာစရာ ရှေးဟောင်းသာသနိက အဆောက်အဦးများ၊ ရှေးလက်ရာ ပန်းတမော့၊ နံရံဆေးရေးပန်းချီများ ရှိနေသည်။ တစ်ချိန်က ဒေသခံတို့က လှေသူကြီးဘုရားခေါ် ရွှေရောင်တော်စေတီ (ရှေးစေတီကို ပြန်လည်ရှင်းလင်းပြုပြင်မှ ရွှေရောင်တော်စေတီဆိုတဲ့ ဘွဲ့တော်ကို ပြန်တွေ့)၊ အဲဒီ ရွှေရောင်တော်ဘုရားက မြန်မာ့နိုင်ငံမှာ မင်းကွန်းခြင်္သေ့ကြီး နှစ်ကောင်ပြီးလျှင် ဒုတိယ အကြီးဆုံး ဖြစ်နိုင်ခြေရှိတဲ့ ခြင်္သေ့ကြီး နှစ်ကောင် (ကုန်းဘောင်ခေတ် ဘိုးတော်ဘုရားလက်ထက် လက်ရာ)၊ ငါးဆူဘုရား (ရွှေရောင်တော်ဘုရားဝင်း အတွင်းလက်ျာဘက်တွင်ရှိ)၊ အရှေ့ဖက် ရပ်တော်မူဘုရား၊ ရပ်တော်မူ ဘုရားနဘေး တစ်ဖက်တစ်ချက်စီမှ ဖောင်းကြွနဂါးကြီးများ (တစ်ကောင်နှင့်တစ်ကောင် မုတ်ဆိတ်၊ အမောက်၊ ပါးစပ် ပုံသဏ္ဌာန်မတူသော နဂါးကြီးလေးကောင်) စသည့် လေ့လာစရာတွေက များမှများပင်။

မက္ခရာမြို့ဟောင်းအပြင်ဘက် အနောက်တောင်ထောင့် နှစ်ဖာလုံခန့်ဝေးသောနေရာမှာ ရွှေစည်းခုံ စေတီတော်နဲ့ ရွှေဇာတိရုပ် စေတီ (အရပ်အခေါ် ရွှေစာတီစေတီ) စေတီကြီးနှစ်ဆူ ရှိသည်။


(သမိုင်းအချက်အလက်များကို ကျောက်ဆည်မဟာဂန္ဓာရုံဆရာတော် အရှင်ကုသလာဘိဝံသ၏ မက္ခရာဝံသနှင့် ဆရာမကြီးညွန့်ညွန့် (ကျောက်ဆည်) ပြုစုသော မက္ခရသမိုင်း စာအုပ်များမှ ရယူထားပါသည်။)

ကိုးကား

    This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.