မြန်မာနိုင်ငံ၏ နိုင်ငံတော်အထိမ်းအမှတ်တံဆိပ်

ပြည်ထောင်စုသမ္မတမြန်မာနိုင်ငံတော်အထိမ်းအမှတ်တံဆိပ်သည် နိုင်ငံတော်အစိုးရ၏လုပ်ငန်းဆိုင်ရာများတွင်အသုံးပြုသောတံဆိပ်ဖြစ်သည်။နိုင်ငံ​တော်အထိမ်းအမှတ်တံဆိပ်ကို ယင်း၏ဂုဏ်ကျက်သ​ရေနှင့်အညီ နည်းလမ်းတကျအသုံးပြုရန်နှင့် ထိန်းသိမ်း​စောင့်​ရှောက်ကြရန်အလို့ငှာ နိုင်ငံ​တော်အထိမ်းအမှတ်တံဆိပ်ဥပ​ဒေနည်းဥပ​ဒေများကို ပြဋ္ဌာန်းထားသည်။

မြန်မာပြည်၏ နိုင်ငံတော် အထိမ်းအမှတ် တံဆိပ်
Details
အသုံးပြုသူပြည်​ထောင်စုသမ္မတမြန်မာနိုင်ငံ​တော်
စတင်အသုံးပြုခြင်း၂၀၀၈
ထိပ်ရွှေကြယ်
အရံများခြင်္သေ့

ဖော်ပြချက်

  • နိုင်ငံ​တော်အထိမ်းအမှတ်တံဆိပ်၏ အလယ်တွင် ပြည်​ထောင်စုသမ္မတမြန်မာနိုင်ငံ​တော်​မြေပုံပါရှိသည်။အရွက် ၁၄ရွက်ရှိ​သော သ​ပြေခက်များက ​မြေပုံကို တစ်ဖက်တစ်ချက် ဝန်းရံထားသည်။
  • သ​ပြေခက်များ၏ တစ်ဖက်တစ်ချက်တွင် အနုပညာ​မြောက် မြန်မာ့ခြင်္သေ့တစ်စီးစီရှိသည်။လက်ဝဲဘက်မှခြင်္သေ့သည် လက်ဝဲဘက်၊လက်ယာဘက်မှခြင်္သေ့သည် လက်ယာဘက်သို့ မျက်နှာမူ​နေသည်။
  • ပြည်​ထောင်စုသမ္မတမြန်မာနိုင်ငံ​တော်ဟူ​သောစာတမ်းကို ​အောက်​ခြေရှိဖဲပြား​ပေါ်တွင် ​ဖော်ပြသည်။ပြည်​ထောင်စုဟူ​သောစာတမ်းကို လက်ဝဲဘက်ခြင်္သေ့​​အောက်တွင်၊သမ္မတဟူ​သောစာတမ်းကို ​မြေပုံ​အောက်တွင်၊မြန်မာနိုင်ငံ​တော်ဟူ​သောစာတမ်းကို လက်ယာဘက်ခြင်္သေ့​အောက်တွင် ​ဖော်ပြထားသည်။
  • အထိမ်းအမှတ်တံဆိပ်၏ထိပ်တွင် ကြယ်လက်တံငါးခုရှိ​သော ကြယ်တစ်လုံးသည် အထက်သို့ မတ်မတ်ညွှန်းလျက်ရှိသည်။
  • ကြယ်၏တစ်ဖက်တစ်ချက်တွင် မြန်မာပန်းပုံသဏ္ဌန် ပန်းခက်ပြားများရှိသည်။[1]

အသုံးပြုခြင်း

နိုင်ငံ​တော်အထိမ်းအမှတ်တံဆိပ်ကို

  • နိုင်ငံ​တော်သမ္မတရုံးအ​ဆောက်အအုံ၌ တပ်ဆင်အသုံးပြုနိုင်သည်။
  • နိုင်ငံ​တော်သမ္မတ စီးနင်းလိုက်ပါလာ​သော ​ယာဉ်များတွင် အသုံးပြုနိုင်သည်။
  • လွှတ်​တော်အ​ဆောက်အအုံများ(ဗဟို)၊ပြည်​ထောင်စုအဆင့်အစိုးရအဖွဲ့အစည်းများ၏ရုံးများ၊တိုင်း​ဒေသကြီး/ပြည်နယ်လွှတ်​တော်ရုံးများ၊မြန်မာနိုင်ငံ၏ အုပ်ချုပ်​ရေးနယ်​မြေအလိုက် ပိုင်းခြားထား​သော အစိုးရအဖွဲ့အစည်းများ၏ရုံးများတွင် အသုံးပြုနိုင်သည်။
  • ဝန်ကြီးဌာနအသီးသီးနှင့် ယင်း၏လက်​အောက်ရှိ ဝန်ထမ်းရုံးအဆင့်ဆင့်၊တရားရုံးအဆင့်ဆင့်၊ပြည်​ထောင်စုအစိုးရအဖွဲ့မှ တပ်ဆင်ရန်ခွင့်ပြုထား​သော အဖွဲ့အစည်း၊ဌာနများ၏ ရုံးများတွင်လည်း​ကောင်း အသုံးပြုနိုင်သည်။
  • မြန်မာနိုင်ငံကိုယ်စားပြု နိုင်ငံခြားသံတမန်​ရေးရာ ရုံးအသီးသီးတွင်လည်း​ကောင်း အသုံးပြုနိုင်သည်။
  • နိုင်ငံ​တော်ဧည့်ခံအခမ်းအနားများနှင့် နိုင်ငံ​တော်ကို ကိုယ်စားပြု​​သောပုဂ္ဂိုလ်များက ပြုလုပ်​သောအခမ်းအနားများတွင် အသုံးပြု​သော ပစ္စည်းများတွင် ရိုက်နှိပ်၍ အသုံးပြုနိုင်သည်။
  • နိုင်ငံ​တော်​​ငွေစက္ကူနှင့် တံဆိပ်​ခေါင်းများတွင် အသုံးပြုနိုင်သည်။
  • နိုင်ငံ​တော်သမ္မတကခွင့်ပြု​သော အဖွဲ့အစည်းများနှင့် ကာကွယ်​ရေးဝန်ကြီးဌာန၏ ကွပ်ကဲမှုလက်​အောက်ရှိ လက်နက်ကိုင်တပ်ဖွဲ့ဝင်များ၏ ဝန်ထမ်းအဆင့်အတန်းနှင့် စပ်လျဉ်း၍လည်း​ကောင်း၊ယင်းဝန်ထမ်းများ၏ ဝတ်စားဆင်ယင်မှုနှင့် စပ်လျဉ်း၍လည်း​ကောင်း အသုံးပြုနိုင်သည်။
  • နိုင်ငံတစ်ဝှမ်းရှိ လွှတ်​တော်များ၊ပြည်​ထောင်စုအစိုးရအဖွဲ့နှင့် ဝန်ကြီးဌာနများ၊အုပ်ချုပ်​ရေးနယ်​မြေအလိုက် ပိုင်းခြားထား​သော အစိုးရအဖွဲ့အစည်းများနှင့် ပြည်​ထောင်စုအစိုးရမှခွင့်ပြုထား​သော ဌာန၊အဖွဲ့အစည်းများ၏ ရုံးသုံးစာရွက်စာတမ်းများ​ပေါ်တွင် ရိုက်နှိပ်အသုံးပြုနိုင်သည်။
  • နိုင်ငံ​တော်အစည်းအ​ဝေးများနှင့် အခမ်းအနားများတွင် အသုံးပြုနိုင်သည်။[1]

သမိုင်းကြောင်း

ယခင်မြန်မာဘုရင်များလက်ထက်က အမှတ်တံဆိပ်တော်မှာ အစိမ်းရောင်ကဒေါင်းဖြစ်သည်။

ဗြိတိသျှကိုလိုနီခေတ်တွင်လည်း ဒေါင်းပုံကိုပင် ဗြိတိသျှမြန်မာကိုလိုနီ တံဆိပ်အဖြစ် ဆက်လက်အသုံးပြုခဲ့သည်။

ဂျပန်ခေတ် မြန်မာနိုင်ငံတော်၏ တံဆိပ်မှာ ရွှေရောင် ဒေါင်းအလှပုံဖြစ်သည်။

လွတ်လပ်ရေးရပြီးနောက် ပထမဆုံးအသုံးပြုခဲ့သည့် နိုင်ငံတော်တံဆိပ်ဟောင်းတွင်ပြည်ထောင်စုသမတမြန်မာနိုင်ငံတော်ဟုပါရှိပြီးခြင်္သေ့၃ကောင်ပါဝင်သည်။နောက်မှထိပ်တွင်ရှိသောခြင်္သေ့ကို ရွှေကြယ်ဖြင့်အစားထိုးခဲ့သည်။မြန်မာပြည်မြေပုံကိုဝန်းရံထားသော စက်သွားပေါ်တွင် ဓမ္မပဒ အပိုဒ်ရေ ၁၉၄မှသမဂ္ဂါနံ တပေါ သုခေါဟူသောစာသားပါရှိသည်။နိုင်ငံ၏အမည်ကိုလိုက်၍ နဖူးစည်းစာသားမှာပြောင်းလဲနေသည်။

ဦးနေဝင်းလက်ထက်တွင် ၁၉၇၄ခုနှစ်ဖွဲ့စည်းပုံအခြေခံဥပဒေအရ ဆိုရှယ်လစ် လက္ခဏာအချို့ဖြင့်ပြင်ဆင်ခဲ့သည်။နောက်ခံအပြာရောင်ရှိသော အနီရောင်မြေပုံကို စက်သွား၊စပါးနှံ၂ခက်ဖြင့်ဝန်းရံထားသည်။ဘေးတွင်အပြာရောင်ခြင်္သေ့၂ကောင်နှင့်ထိပ်တွင်ကြယ်ဖြူတစ်လုံးရှိသည်။ကျန်နေရာများကိုပန်းကနုတ်များထည့်သွင်းထားသည်။နဖူးစည်းတွင်ပြည်ထောင်စု ဆိုရှယ်လစ်သမ္မတ မြန်မာနိုင်ငံတော်ဟုပါရှိသည်။

၁၉၈၈ခုနှစ် စက်တင်ဘာလ ၁၈ နောက်ပိုင်းတွင် နိုင်ငံတော်ငြိမ်ဝပ်ပိပြားမှုတည်ဆောက်ရေးကောင်စီ(နဝတ)အစိုးရသည် နိုင်ငံတော်အထိမ်းအမှတ်တံဆိပ်မှဆိုရှယ်လစ်သမ္မတဟူသောစာသားကိုဖြုတ်ခဲ့ပြီး တံဆိပ်တစ်ခုလုံးကိုရွှေရောင်ပြောင်းခဲ့သည်။

၂၀၀၈ခုနှစ် ဖွဲ့စည်းပုံအခြေခံဥပဒေအရ လက်ရှိအမှတ်တံဆိပ်ကိုသုံးခဲ့သည်။ စက်သွား၊စပါးနှံ၂ခက်ကို ဖယ်ရှားကာ သံလွင်ခက်၂ခက်ဖြင့် မြေပုံကိုဝန်းရံသည်။ အရောင်ကိုလည်း ရွှေရောင်နှင့်အနီရောင်တို့ကိုအသုံးပြုခဲ့သည်။

ပြခန်း

ဆက်စပ်ကြည့်ရန်

မြန်မာနိုင်ငံ၏ အလံတော်

မြန်မာနိုင်ငံအခြေခံဥပဒေ(၂၀၀၈)

နိုင်ငံ​တော်အထိမ်းအမှတ်တံဆိပ်ဥပ​ဒေ

နိုင်ငံတော်အထိမ်းအမှတ်တံဆိပ်နည်းဥပဒေများ

ကိုးကား

  1. နိုင်ငံ​တော်အထိမ်းအမှတ်တံဆိပ်ဥပ​ဒေနှင့် နည်းဥပ​ဒေများ အထွေထွေအုပ်ချုပ်ရေး ဦးစီးဌာန
This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.