မြန်မာ့ရေနံနှင့် သဘာဝဓာတ်ငွေ့လုပ်ငန်း

၁၉၆၃ ခုနှစ်မတိုင်မီ မြန်မာနိုင်ငံ၏ရေနံလုပ်ငန်းအား နိုင်ငံခြားကုမ္ပဏီများကသာ ဆောင်ရွက် ခဲ့ပါသည်။ ယင်းကုမ္ပဏီများအနက် ဘီအိုစီရေနံကုမ္ပဏီသည် အကြီးဆုံးကုမ္ပဏီတစ်ခုဖြစ်သည်။ ၁၉၆၃ ခုနှစ်၊ ဇန်နဝါရီလ ၁ ရက်နေ့တွင် ဘီအိုစီကုမ္ပဏီအား ပြည်သူပိုင်သိမ်းပြီးနောက်ပိုင်းမှ စတင်၍ ရေနံလုပ်ငန်းသည် နိုင်ငံပိုင်လုပ်ငန်းဖြစ်လာခဲ့ပါသည်။ ပြည်သူ.ရေနံလုပ်ငန်း၊ မြန်မာ့ရေနံကော်ပိုရေးရှင်း စသည့်အမည်များဖြင့် လုပ်ငန်းများဆောင်ရွက်ခဲ့ပြီး ၁၉၈၉ ခုနှစ်တွင် ယခုလက်ရှိအမည်ဖြစ်သော မြန်မာ့ရေနံနှင့် သဘာဝဓာတ်ငွေ့လုပ်ငန်း အမည်သို့ ပြောင်းလဲခဲ့သည်။

မြန်မာ့ရေနံနှင့်သဘာဝဓာတ်ငွေ.လုပ်ငန်း၏ အဓိက လုပ်ငန်းတာဝန်များမှာ

• ကိုယ်ပိုင်အရင်းအမြစ်များဖြင့် ရေနံနှင့်သဘာဝဓာတ်ငွေ့ ရှာဖွေတူးဖော်ထုတ်လုပ်ခြင်း၊
• သဘာဝဓာတ်ငွေ့ပိုက်လိုင်းများ တည်ဆောက်၍ ပြည်တွင်းသုံးသဘာဝဓာတ်ငွေ့ ဖြန့်ဖြူးခြင်း၊
• မော်တော်ယာဉ်များအတွက် စီအင်ဂျီဓာတ်ငွေ့အား အစားထိုးလောင်စာအဖြစ် ဖြန့်ဖြူးခြင်း၊
• နိုင်ငံခြားရေနံကုမ္ပဏီများနှင့် ထုတ်လုပ်မှုအပေါ် ခွဲဝေခံစားရေးစာချုပ်များချုပ်ဆို၍ အကျိုးတူ ပူးပေါင်းဆောင်ရွက်ခြင်းနှင့် ယင်းတို့၏လုပ်ငန်းများအပေါ် ကြီးကြပ်ကွပ်ကဲခြင်း တို့ဖြစ်သည်။

မြန်မာ့ရေနံနှင့်သဘာဝဓာတ်ငွေ့လုပ်ငန်း၏ အကြီးအကဲမှာ ဦးဆောင်ညွှန်ကြားရေးမှူးဖြစ်ပြီး ဦးဆောင်ညွှန်ကြားရေးမှူး၏ လက်အောက်တွင် ဌာနကြီး(၉)ခုနှင့် စီမံအုပ်ချုပ်မှုအရ ရေနံမြေ (၁၁)ခု ဖွဲ့စည်းထားပါသည်။ ဌာနကြီး(၉)ခုမှာ

1. စီမံရေးဌာန
2. အထွေထွေစီမံခန့်ခွဲရေးဌာန
3. ဘဏ္ဍာရေးဌာန
4. ရှာဖွေရေး/ဖွံ့ဖြိုးရေးဌာန
5. ကမ်းလွန်ရှာဖွေရေးဌာန
6. တူးဖော်ရေးဌာန
7. ထုတ်လုပ်ရေးဌာန
8. အင်ဂျင်နီယာလုပ်ငန်းဌာန
9. ပစ္စည်းစီမံဌာန တို့ဖြစ်သည်။

စီမံအုပ်ချုပ်မှုအရ စုစည်းထားသည့် ရေနံမြေများမှာ

1. သာကြီးတောင်-စပယ်ရေနံမြေ
2. ကျောက်ခွက်-လက်ပံတို-အရာတော်ရေနံမြေ
3. ချောက်-လမ်းရွာရေနံမြေ
4. ရေနံချောင်းရေနံမြေ
5. မန်းရေနံမြေ
6. ထန်းကိုင်းဒေသကြီးရေနံမြေ
7. ထောက်ရှာပင်-ကမ်းနီရေနံမြေ
8. ပြည်ရေနံမြေ
9. မြန်အောင်-ရွှေပြည်သာရေနံမြေ
10. အဖျောက်ရေနံနှင့်သဘာဝဓာတ်ငွေ့မြေ
11. ညောင်တုန်းရေနံနှင့်သဘာဝဓာတ်ငွေ့မြေ တို့ဖြစ်သည်။

[1]

• မြန်မာ့ရေနံနှင့် သဘာဝဓာတ်ငွေ့လုပ်ငန်း Archived 26 October 2014 at the Wayback Machine.