ကြာအင်းဆိပ်ကြီးမြို့နယ်

ကြာအင်းဆိပ်ကြီးမြို့နယ်သည် ပထမ အင်္ဂလိပ်-မြန်မာ စစ်ပွဲ အပြီးတွင် အင်္ဂလိပ်အား ပေးလိုက်ရသော ကျိုက္ခမီခရိုင်တွင် ပါဝင်ခဲ့သည်။ ၁၉၁၁ ခုနှစ်မှ စ၍ ကြာအင်းဆိပ်ကြီးမြို့နယ်ကို ကော့ကရိတ်ခရိုင်ခွဲအဖြစ် နယ်ပိုင်ဝန်ထောက်တစ်ဦးက အုပ်ချုပ်ခဲ့သည်။ ထိုအချိန်က ကြာအင်းဆိပ်ကြီးမြို့နယ်သည် သစ်တောထူထပ်ပြီး စတုရန်းမိုင် ၁ မိုင်လျှင် လူဦးရေ ၂၀ ခန့်သာ နေထိုင်ခဲ့သည်။[1]

၁၉၅၅ ခုနှစ် ဇူလိုင် ၁ ရက်နေ့တွင် ကြာအင်းဆိပ်ကြီးမြို့နယ်ကို ဘားအံခရိုင်တွင် ထည့်သွင်းခဲ့သည်။ ထို့နောက် ၁၉၆၂ ခုနှစ် နိုဝင်ဘာ ၆ ရက်နေ့တွင် ဘားအံခရိုင်မှ ကော့ကရိတ်ခရိုင်သို့ ပြောင်းရွေ့ထည့်သွင်းခဲ့သည်။

ဇမိချောင်းကမ်းနဖူး သစ်ဆိပ်ကို အစွဲပြု၍ ချောင်းရိုးတစ်လျောက် ခုတ်မောင်းနေသည့် လှေ၊ သင်္ဘောများက ဆိပ်ကြီး ဟုခေါ်ရာမှ ကြာအင်းဆိပ်ကြီးမြို့ ဖြစ်လာခဲ့သည်။ မြို့၏ မြောက်ဘက် ၁ မိုင်ခန့်ရှိ ကြာအင်းကြီးကျေးရွာနှင့် တောင်ဘက် ဇမိမြစ်ကမ်းသစ်ဆိပ်ကို ပူးတွဲခေါ်ဝေါ်လျက် ကြာအင်းဆိပ်ကြီးမြို့ဟု ခေါ်တွင်လာခဲ့ခြင်း ဖြစ်သည်။[1]

ကြာအင်းဆိပ်ကြီးမြို့နယ်သည် မြောက်လတ္တီတွဒ် ၁၅ ဒီဂရီ ၁၃ မိနစ် ၁၅ စက္ကန့်နှင့် ၁၆ ဒီဂရီ ၀၂ မိနစ် ၀၀ စက္ကန့်အကြား၊ အရှေ့လောင်ဂျီတွဒ် ၉၇ ဒီဂရီ ၄၅ မိနစ် ၃၀ စက္ကန့်နှင့် ၉၈ ဒီဂရီ ၀၇ မိနစ် ၀၀ စက္ကန့်အကြားတွင် တည်ရှိသည်။ ပင်လယ်ရေမျက်နှာပြင်အမြင့်မှာ ၃၇ ပေ (၁၁ မီတာ) ဖြစ်ပြီး မြို့နယ်အကျယ်အဝန်းမှာ ၃,၀၃၁.၀၁ စတုရန်းမိုင် (၁,၉၃၉,၈၅၀ ဧက) ဖြစ်သည်။ အရှေ့မှ အနောက်သို့ မိုင် ၅၀ နှင့် တောင်မှ မြောက်သို့ ၈၂ မိုင် ရှည်လျားသည်။[1]

• "Kya-In Seikkyi Township Google Satellite Map" Maplandia World Gazetteer