ရွှေကျင်ဂိုဏ်း

မင်းတုန်းမင်းကြီးသည် ဝိနည်းသိက္ခာအလွန်လေးစား၍ အကျင့်ပဋိပတ်နှင့်ပြည့်စုံသော ရွှေကျင်ဆရာတော်ဘုရားကြီးဦးဇာဂရကို အလွန်တရာကြည်ညို၍ သာသနာပိုင်အဖြစ် တင်မြှောက်လိုသော်လည်း တောင်နန်းမိဖုရားခေါင်စကြာဒေဝီ၏ဆန္ဒကိုမလွန်ဆန်နိုင်သဖြင့် မောင်းထောင်ဆရာတော် ကိုသာသနာပိုင်တင်မြှောက်ခဲ့ရသည်။ အခါတစ်ပါး ရွှေကျင်ဆရာတော်ဘုရားက သာသနာပိုင်ဆရာတော်ထံသွားရောက်ရာ စကားမပြောဆိုပဲ နေခဲ့သဖြင့် ဆရာတော်မှ မိမိအားမလိုလားဟု သဘောပိုက်တော်မူခဲ့သည်။ ယင်းနောက် ၁၂၁၄ ခုနှစ်တွင် ရွှေကျင်ဆရာတော်ကို သုဓမ္မာဆရာတော်များအမိန့်ဖြင့် သုဓမ္မာသိုကြွရန်ဆင့်ဆိုရာမကြွဘဲနေသဖြင့် သုဓမ္မာဆရာတော်များက အတင်းအကြပ် ခေါ်ဆိုရန် စီမံရာတွင် မင်းတုန်းမင်းကြီးက ရွှေကျင်ဆရာတော်အား သုဓမ္မာသို့ ဆင့်ခေါ်ခွင့်မရှိ၊ ရွှေကျင်ဆရာတော် လွတ်လပ်စွာသီတင်းသုံးနိုင်သည်ဟု အမိန့်ထုတ်ပြန်ခဲ့သည်။ ထိုအချိန်မှစ၍ ရွှေကျင်ဆရာတော်ဘုရားကြီးဦးဇာဂရ၏ တပည့်သံဃာတော်အဆက်ဆက်တို့ကို ရွှေကျင်ဂိုဏ်းဝင်ဟုခေါ်ဆိုကြသည်။

မင်းတုန်းဘုရင်လက်ထက်မှစ၍ ယနေ့ခေတ်အထိ ရွှေကျင်သာသနာပိုင်အဖြစ် ထမ်းဆောင်တော်မူကြသော ဆရာတော်များမှာ အောက်ပါအတိုင်းဖြစ်သည်။[3]

1. ရွှေကျင်ဆရာတော်ဘဒ္ဒန္တဇာဂရ
2. မဟာဝိသုဒ္ဓါရုံဆရာတော်ဘဒ္ဒန္တဝိသုဒ္ဓါစာရ
3. ဒီပဲရင်းဆရာတော်ဘဒ္ဒန္တဥာဏဝရ
4. ကျိုက္ကစံဆရာတော်ဘဒ္ဒန္တဥတ္တမ
5. အလုံဆရာတော်ဘဒ္ဒန္တတိသ
6. ချမ်းသာကြီးဆရာတော်ဘဒ္ဒန္တဇလိန္ဒ
7. လှတောကြီးဆရာတော်ဘဒ္ဒန္တရာဇိန္ဒ
8. ကျိုက်လတ်ပစ္ဆိမာရုံဆရာတော်ဘဒ္ဒန္တကောလာသ
9. ကန္နီဆရာတော်ဘဒ္ဒန္တကောသလ္လ
10. စံကင်းဆရာတော်ဘဒ္ဒန္တစန္ဒာဘိဝံသ
11. မြောင်းမြဆရာတော်ဘဒ္ဒန္တဥာနဝံသာဘိဝံသ
12. ကြေးမြင်ဆရာတော်ဘဒ္ဒန္တဇောတယာဘိဝံသ
13. ရွှေဟင်္သာဆရာတော်ဘဒ္ဒန္တပဏ္ဍိတသိရီ
14. ညောင်ရွှေကန်ကြီးဆရာတော်ဘဒ္ဒန္တဝိမလာဘိဝံသ
15. ဝါဆိုဆရာတော်ဘဒ္ဒန္တအဂ္ဃိယပဏ္ဍိတ
16. ဝိဇ္ဇောတာရုံဆရာတော်ဘဒ္ဒန္တဝိဇ္ဇောတ