ဖလမ်းမြို့နယ်

လိုင်လွန်ရွာတည်ထောင်ခဲ့သူ ဦးထွန်းကိုင်၌ သား ၃ ယောက်ရှိပြီး သားကြီးတိုင်ဆွန်းအား လက်ရှိ ဖလမ်းမြို့ ၊ ကျင်မွာလ်ရပ်ကွက် တွင်တည်ရှိသော ယက်ကန်းကျောင်း အောက်ဘက်တွင် ဖခင်ဖြစ်သူမှ အေဒီ ၁၅၀၀ ခန့်တွင် ရွာတည်ထောင်ပေးခဲ့သည်။ ရွာတည်ထောင်သူ တိုင်ဆွန်းအားအစွဲပြု၍ တာရွှန်းရွာဟု ခေါ်ဝေါ်ခဲ့သည်။ ထိုခေတ်အခါက လက်နက်ကိရိယာမကောင်းသဖြင့် စစ်ပွဲဆင်နွှဲရာတွင် အခြေအနေမကောင်းခဲ့ပေ။ စစ်ပွဲဆင်နွှဲခြင်း၊ လျှို့ဝှက်စွာအသတ်ခံရခြင်းတို့ကြောင့် သားသမီးများနှင့် ကလေးများကို ဝှက်ထားရန်အတွက် ရွာ၏အရှေ့ဘက် တစ်မိုင်ခန့်အကွာ ချောက်ကမ်းပါး၊ ကျောက်တောင်၊ သစ်တောကြီးများရှိပြီး အောက်ဘက်တွင်လည်း မဏိပူရမြစ်စီးဆင်းနေသော နေရာတွင် တဲဆောက်နေထိုင်ခဲ့ရာမှ ရွာတည်ခဲ့ပြီး ဖလှမ်ဟု အမည်ပေးခဲ့သည်။ သားသမီးများ အေးချမ်းစွာနားခိုရာတဲဟု အဓိပ္ပာယ်ရသည်။[2]

မြောက်လတ္တီတွဒ် ၂၂ ဒီဂရီ ၅၀ မိနစ်နှင့် ၂၃ ဒီဂရီ ၂၀ မိနစ် အကြား၊ အရှေ့လောင်ဂျီတွဒ် ၉၃ ဒီဂရီ ၂၀ မိနစ်နှင့် ၉၄ ဒီဂရီ ၈၀ မိနစ်အကြားတွင် တည်ရှိသည်။ အရှေ့မှ အနောက်သို့ မိုင် ၄၀၊ တောင်မှမြောက်သို့ ၂၅ မိုင်ရှိပြီး ၉၈၈.၉၀ စတုရန်းမိုင် ကျယ်ဝန်းသည်။[2] ဖလမ်းမြို့နယ်သည် တောင်တန်းထူထပ်သော မြို့နယ်တစ်ခု ဖြစ်သည်။ မြို့နယ်တွင်းရှိ အမြင့်ဆုံးတောင်ထိပ်ဖြစ်သော ဇိုင်းမူတောင်သည် ချင်းပြည်နယ်တွင် ဒုတိယအမြင့်ဆုံး တောင်ထိပ် ဖြစ်သည်။ မဏိပူရမြစ်သည် မြို့နယ်အလယ်ကို ဖြတ်သန်းကာ တောင်ဖက်သို့ စီးဆင်းသွားသည်။ အသည်းပုံ ရိဒ်ရေကန်ကြောင့် ဖလမ်းမြို့သည် ထင်ရှားသည်။

ဖလမ်းမြို့နယ်တွင်နေထိုင်ကြသော တိုင်းရင်းသားလူမျိုးစုများတွင် ချင်းလူမျိုးများ အများဆုံးနေထိုင်ကြသည်။ ထို့နောက် ဗမာ၊ ကရင်၊ ကချင်နှင့် ရခိုင်လူမျိုးများ အစဉ်လိုက်များပြားစွာနေကြသည်။ ကိုးကွယ်မှုအနေဖြင့် ခရစ်ယာန်ဘာသာကို အများဆုံး ကိုးကွယ်ကာ ဗုဒ္ဓဘာသာ၊ဟိန္ဒူ၊အစ္စလာမ်နှင့် အခြားကိုးကွယ်သူဦးရေမှာ အစဉ်လိုက်များပြားသည်။[2]

ဖလမ်းမြို့နယ်သည် ချင်းပြည်နယ်အတွင်းရှိ စီးပွားရေး အတော်အသင့်ကောင်းမွန်သော မြို့နယ်ဖြစ်သည်။ မြို့နယ်နေလူထုသည် စိုက်ပျိုးရေးနှင့် မွေးမြူရေးလုပ်ငန်းကို အများဆုံး လုပ်ကိုင်ကြသည်။ မြို့နယ်အတွင်း အိမ်တွင်းစက်မှုလက်မှုလုပ်ငန်း ၁၈ ခု တည်ရှိသည်။

ဖလမ်းမြို့နယ်သည် ကလေး-ဖလမ်း-ဟားခါးလမ်းပေါ်တွင် တည်ရှိ၍ လမ်းပန်းဆက်သွယ်ရေးကောင်းမွန်သည်။ ၂၀၂၀ ခုနှစ်တွင် ဆူဘုန် လေဆိပ်တည်ဆောက်ပြီးစီးခဲ့ပြီး မကြာခင် စတင်အသုံးပြုနိုင်မည် ဖြစ်သည်။

• ဖလမ်း ခရိုင်ဆေးရုံကြီး
• ရီခေါ်ဒါရ် ဆေးရုံ
• လုမ်ဘန်း တိုက်နယ်ဆေးရုံ
• သီးဘွာလ် တိုက်နယ်ဆေးရုံ

• "ချင်းပြည်နယ် ဖလမ်းမြို့နယ်" မြေပုံ၊ မြန်မာသတင်းအချက်အလက် စီမံခန့်ခွဲရေးအဖွဲ့
• "Falam Google Satellite" Maplandia World Gazetteer