ကျိုက်လတ်မြို့နယ်

၁၈၄၀ ခုနှစ်ခန့်က ဧရာဝတီတိုင်းနှင့် ပဲခူးတိုင်းတို့မှ စစ်ဘေးဒဏ်ကြောင့် ပြောင်းရွှေ့လာသော မွန်လူမျိုးတို့သည် ယခု ကျိုက်လတ်မြို့နေရာတွင် ကျေးရွာတည်ထောင်ခဲ့သည်။[2] ရွာသူ၊ ရွာသားတို့က ဉာဏ်တော် ၉ တောင်ရှိ စေတီတစ်ဆူကို တည်ထားကိုးကွယ်ကြရာ မြစ်ရေတိုက်စားပြီး ကမ်းပါးပြိုကျမှုကြောင့် မွန်ဘာသာဖြင့် ကျိုက်လွိုက် (ကျိုက် = ဘုရား၊ လွိုက် = ပြိုလဲခြင်း) ဘုရားပြိုရွာဟုခေါ်ရာမှ စ၍ နောင်တွင် ကျိုက်လတ်ဟု ခေါ်တွင်ခဲ့သည်။[2]

ကျိုက်လတ်မြို့ကို ၁၈၆၁ ခုနစ်တွင် တည်ထောင်ခဲ့ပြီး၊ ၁၈၈၇ ခုနစ်တွင် သုံးခွခရိုင်ထဲ၌ ပါဝင်ခဲ့သည်။ ၁၈၈၂ ခုနှစ်တွင် အင်္ဂလိပ်မြို့အုပ် မစ္စတာမက္ကဆွဲနှင့် အတွင်းရေးမှူး ဦးစိန်ထူးတို့မှ မြို့၏ ကွက်သစ်များကို စတင် ပန္နရိုက်ပြီး မြို့တည်ခဲ့သည်။[2]

၁၉၉၀ ပြည့်နှစ်တွင် မြို့ကော်မတီဖွဲ့စည်းပြီး၊ ၁၉၀၅ ခုနှစ်တွင် မြူနီစပါယ်အဖွဲ့ကို ဖွဲ့စည်းခဲ့သည်။ မြူနီစပါယ်အဖွဲ့နှင့် ဒေသန္တရအဖွဲ့တို့က ကျိုက်လတ်မြို့ကို ၂၇-၅-၁၉၀၅ နေ့တွင် အမိန့်ကြော်ငြာစာအမှတ် ၁၉ ဖြင့် မြို့အဖြစ် သတ်မှတ်ခဲ့သည်။ ကျိုက်လတ်မြို့သည် ပင်လယ်ရေမျက်နှာပြင်အထက် ၁၆.၃၅ ပေအထက်တွင် တည်ရှိသည်။[2]

ကျိုက်လတ်မြို့နယ်သည် ပူအိုက်စွတ်စိုသော ရာသီဥတုရှိပြီး၊ အမြင့်ဆုံးအပူချိန် ၃၇ ဒီဂရီစင်တီဂရိတ်နှင့် အနိမ့်ဆုံးအပူချိန် ၁၈ ဒီဂရီစင်တီဂရိတ်တို့ ဖြစ်ပါသည်။

ကျိုက်လတ်မြို့နယ်အတွင်းတွင် တောရိုင်းတိရစ္ဆာန်များ မရှိသော်လည်း ကုက္ကို၊ လမု၊ မိုးမခ၊ ဓနိ၊ ကွမ်းသီး၊ အုန်းနှင့် သရက်ပင်များ ပေါများပါသည်။

ကျိုက်လတ်မြို့နယ်၏ စိုးရိမ်ရေအမှတ်မှာ ၈.၂ စင်တီမီတာ ဖြစ်ပြီး၊ မြို့နယ်အတွင်း သဘာဝဘေးအန္တရာယ်ကျရောက်မှုများမှာ ၂၀၀၆ ခုနှစ်နှင့် ၂၀၀၈ ခုနှစ်တွင် မုန်တိုင်းအန္တရာယ် တစ်ကြိမ်စီနှင့် ၂၀၁၂ ခုနှစ်တွင် လေပြင်းတိုက်ခတ်မှု ၁ ကြိမ် ကြုံတွေ့ခဲ့သည်။[2]

ကျိုက်လတ်မြို့နယ်တွင် ကရင်၊ ချင်း၊ မွန်၊ ဗမာ၊ ရခိုင်နှင့် ရှမ်းလူမျိုးများ နေထိုင်ကြပြီး ၂၀၁၉ စက်တင်လ၏ စစ်တမ်းအရ အိမ်ခြေပေါင်း ၄၃၄၁၂၊ အိမ်ထောင်စုပေါင်း ၄၃၇၃၁ ရှိပါသည်။ ကျေးရွာအုပ်စု ၈၇ အုပ်စုရှိပြီး ကျေးရွာပေါင်း ၄၂၁ ရွာ ရှိသည်။[2]

ထို့ပြင် ကျိုက်လတ်မြို့တွင် တရုတ် (လူဦးရေ ၃၈၉)၊ အိန္ဒိယ (လူဦးရေ ၆၈၉)၊ ပါကစ္စတန် (လူဦးရေ ၄၃)၊ ဘင်္ဂလားဒေ့ရှ် (လူဦးရေ ၂) နှင့် အခြားလူမျိုးစု ၂၁၁ ဦးလည်း နေထိုင်ကြပါသည်။[2]

ကျိုက်လတ်မြို့နယ်သည် စီးပွားရေးအရ စိုက်ပျိုးရေးလုပ်ငန်းကို အဓိက လုပ်ကိုင်ကြပြီး၊ အဓိကထွက်ကုန်များမှာ ဆန်/စပါး ဖြစ်သည်။ ထို့ပြင် ကြက်မွေးမြူရေး၊ ငါးမွေးမြူရေးနှင့် ပုဇွန်မွေးမြူရေးလုပ်ငန်းများလည်း လုပ်ကိုင်ကြသည်။[2]

ကျိုက်လတ်မြို့နယ်တွင် စက်မှုသိပ္ပံကောလိပ် တည်ရှိပြီး၊ အထက်တန်းကျောင်း ၁၂ ကျောင်း၊ အထက်တန်းကျောင်းခွဲ ၇ ကျောင်း၊ အလယ်တန်းကျောင်း ၁၄ ကျောင်း၊ အလယ်တန်းကျောင်းခွဲ ၁၆ ကျောင်း၊ မူလတန်းလွန်ကျောင်း ၃၀ ကျောင်း၊ အမကကျောင်း ၁၁၉ ကျောင်း၊ မူလတန်းကြိုကျောင်း ၉ ကျောင်းနှင့် ဘ.က ဘုန်းတော်ကြီးသင် ပညာရေးကျောင်း ၅ ကျောင်း ရှိသည်။[2]

ကျိုက်လတ်မြို့နယ်တွင် မြို့နယ်အစိုးရဆေးရုံ ၁ ခု၊ တိုက်နယ်အစိုးရဆေးရုံ ၁ ခု၊ အစိုးရဆေးပေးခန်း ၃ ခု၊ ကျေးလက်ကျန်းမာရေးဌာန ၇ ခုနှင့် ကျေးလက်ကျန်းမာရေးဌာနခွဲ ၃၂ ခု ရှိသည်။[2]