ကြံခင်းမြို့

ကြံခင်းမြို့

ကြံခင်းမြို့သည် ဟင်္သာတခရိုင် ကြံခင်းမြို့နယ်၏ ရုံးစိုက် ရာမြို့ဖြစ်၍၊ ဟင်္သာတခရိုင်၏ မြောက်ဖက်အစွန်ဆုံးမြို့နယ် ဖြစ်သည်။ ဧရာဝတီမြစ်၏ အနောက်ဖက်ကမ်းပေါ်တွင် ရှိသည်။ မြို့ပေါ်တွင် အင်းလပ်၊ ရွာသစ်နှင့် မြို့မဟူ၍ အပိုင်း ကြီးသုံးပိုင်းရှိရာ မြို့မရပ်ကွက်ကို မြန်မာသက္ကရာဇ် ၁၁၅ဝ ပြည့်နှစ် ခန့်က မွန်လူမျိုးများက စတင်တည်ထောင်ခဲ့သည်။ အင်းလပ်ရပ်ကွက်ကို သက္ကရာဇ် ၁၁၁၅ ခုနှစ်ခန့်က အထက် အညာ အင်းလပ်အရပ်မှ မောင်ကျောင်းဆိုသူသည် နောက်လိုက် နောက်ပါများနှင့်အတူ ပြောင်းရွေ့ လာရောက်နေထိုင်ပြီးလျှင် အင်းလပ်ဟု အမည်ပေးခဲ့လေသည်။ ရွာသစ်ရပ်ကွက်ကိုလည်း ထိုအချိန်နှင့် မရှေးမနှောင်းခန့်တွင် စတင်တည်ထောင်လာခဲ့ လေသည်။

ကြံခင်းဆိုသော အမည်မှာ မွန်ဘာသာ ကျာံကင်းမှ ဆင်းသက်လာသည်ဟု ဆို၏။ အဓိပ္ပာယ်မှာ ကျောက်မိကျောင်း ရုပ်ရှိသော ကင်း(အကောက်ရုံး) ဖြစ်သည်။ အချို့ကမူ ကြံခင်း သည် မွန်ဘာသာအားဖြင့် ကျာံဂင်ဖြစ်၍ မိချောင်းရဲဟူ၍ အဓိပ္ပာယ်ရသည်ဟု ဆိုကြသည်။

ကြံခင်းမြို့၏ မြူနီစီပါယ်အဖွဲ့ကို ခရစ်နှစ် ၁၈၈၆ ခုနှစ်မှ စ၍ ဖွဲ့စည်းတည်ထောင်ခဲ့သည်။

ကြံခင်းမြို့သည် ဟင်္သာတစ်မြို့မှ မီးရထားလမ်းအတိုင်း ၆၄ မိုင် ကွာဝေး၍ ဟင်္သာတကြံခင်း မီးရထား လမ်းဆုံးမြို့လည်း ဖြစ်၏။ မြို့၏အကျယ်အဝန်းမှာ စတုရန်း ၂ မိုင်ခန့် ဖြစ်၍ ၁၉၅၃ ခုနှစ် သန်းခေါင် စာရင်းအရ လူဦးရေ ၆ဝ၄ဝ ယောက် ခန့် ရှိ၏။ မြို့ပေါ်တွင် တရားရုံး၊ ဆေးရုံနှင့် နိုင်ငံတော် အထက်တန်းကျောင်းအပြင် ဆန်စက်များနှင့် သစ်စက်များ လည်း ရှိသည်။ လောကသယမ္ဘူနှင့် ချမ်းသာကြီးစေတီတော်တို့ မှာ မြို့ပေါ်တွင် ထင်ရှားသော စေတီတော်များ ဖြစ်ကြသည်။ ကြံခင်းမြို့မှ အနောက်ဖက် ၈ မိုင်အကွာတွင် ဖက်ရဲရွာကြီး တည်ရှိသည်။ ထိုရွာမှ တစ်ဆင့် ရခိုင်ရိုးမ ကို ဖြတ်ကျော်လျှင် ရခိုင်တိုင်းသို့ ပေါက်ရောက်နိုင်သည်။ ကြံခင်းမြို့မှ ဧရာဝတီ မြစ်စဉ်အတိုင်း မြောက်ဘက် ရှိ ပြည်မြို့သို့ ၄၈ မိုင်၊ တောင် ဘက် ဟင်္သာတစ်မြို့သို့ ၆၆ မိုင် ဝေးကွာသည်။ ဆိပ်ကမ်း ကောင်းမွန်သဖြင့်၊ မီးသင်္ဘော၊ လှေကြီး လှေငယ်တို့ ဆိုက်ကပ် နိုင်ပြီးလျှင် အရောင်းအဝယ်စည်းကားသောကြောင့် မြို့ပေါ်တွင် ကုန်သည်ကြီးငယ်တို့ များပြားပေသည်။

ပိုးထည်များ ရက်လုပ်ကြ၍၊ ကြံခင်းပိုးထည်မှာ ထင်ရှားလှ ပေသည်။ ကြံခင်းမြို့နယ်မှ ငှက်ပျောခြောက်လည်း အများ အစား ထွက်လေသည်။ [1]

ကိုးကား
  1. မြန်မာ့စွယ်စုံကျမ်း၊ အတွဲ(၂)




This article is issued from Wikipedia. The text is licensed under Creative Commons - Attribution - Sharealike. Additional terms may apply for the media files.